Ich Gotfrid der Sincenperiger vergich für mich vnd fuer all mein eriben und auch nachchöm offenbar mit dem prief allen den dy in sehent horent oder lesent, daz ich mit wobedachtem muet veraintleich und nach rat aller meiner freunt zw den zeiten do wir ez wol tuen machten recht vnd redleich verchauft vnd geben haben vnser hueb dacz Grueb, dy da haist di Roshueb gelegen in Haedershofer pharr vnd di vnser freys aigen ist, auz vnserr nucz vnd gewer den herrn und dem Convent ze Glünick yn ier nucz und gewer yn ze dienn in ir Oblay vmb ain gelt des wir von in gar vnd gancz gericht vnd gebertt sein an all vnser schaeden, mit allen eren rechten nuczen und gesuechen di darczw gehorent besuecht vnd vnbesuecht an geuer. Wir sein auch des ogenanten chauffes ir geberen an aller stat, wo in des not geschiecht in der lancz oder ausser lancz nach des lancz recht. Wer awer daz in an der gewerschaft icht ab gieng mit recht, daz sullen wir in alz aus richten an all ir schaden vnd schullen si das haben dacz vns vnd dacz aller vnser hab wo wir dew haben, wir sein lemptig oder tod. Wir verzeichen vnd auch der oft genanten hueb dacz Grueb, daz wir dhain ansprach noch suechung dar zw nimermer gehaben schullen weder mit recht noch an recht. Daz der chauf vnd handlung hinfür also staet vnd vnczebrochen weleib, gib ich in egenanter Gotfrid der Sinczenperger den offen prief pesidelten mit meinem anhangundem insigel, vnd zw ainr pessern sicherhait mit meins lieben Öhaims Thomans des Haidems anhangundem insigel, mit des vnd aller seinr eriben gunst willen vnd rat dew wandlung und der chauf geschehen ist, vnd vnder dez erbern mans insigel Petreins dez Hinderholczer der das daran gelegt hat durich vnser fleizzing pet willen vnd seinn eriben an schaden. Der prief ist geben nach christes gepurd drewczehenhundert jar darnach in dem vier vnd sibickistem iar an sand Oswalcz tag.

Source Fulltext: OÖUB 8 (Wien 1883) S. 715, Nr. 703