Ich her Hainreich pharrer ze Tw^edech vergich, dar umb daz mier mein hern der apt ze Glunich und der convent da selbs dew wesunder genad tan habent daz ich unvercherter vicari pin dacz Tw^edech mein lebtag, versprich ich und sol in all ja^er jaerleich von der chirichen dacz Tw^edech raichen und geben acht phunt wienner phenning di dann gib und ga^eb sind dem siechmaister auf daz syechhaws, an sand Go^ergen tag vier phunt an sand Phylipz tag ain halbs phunt an unser frawen tag zw^e der dienst zeit ain halbz phunt und an sand Marteins tag drew^e phunt unverzogenleich und an alz weihen. Ich versprich auch und schol allew pherrleichew^e recht volfueren und auzrichten und dhain saumung in dem goczdienst nicht haben nach der stiftprief sag dy wier paidendhalben dar uber haben, und schol auch alz daz aus richten und volfu^eeren daz mein vorvoder saeliger getan hat. Wer awer daz ich dez alz nicht taeet und volfu^eeraecht alz oben verschriben ist, wiegetanw^e no^etung mich dann mein herr der apt von Glu^enick dar umb anlegt, dez sol ich alz gehorsam sein und dhain widerred noch auzgeng da wider nicht haben. Und daz daz also hin fu^er staet und unzebrochen weleib, gib ich in obgenanter her Hainreich pharrer dacz Tw^edech den offen prief versigeltten mit meinem anhangunden insigel, dar under ich mich verpint mit meinn tra^ewen alles daz sta^et ze haben und ze volfu^eeren daz oben verschriben stet, und zu aür pesser zeugnu^ezz under dez erbern herrn herrn Meinharcz insigel zw^e den zeiten techent dacz Ens und under dez erbern mans insigel Petreins dez Herczinger puriger ze Ens. Der prief ist geben nach Christes gepurd tausent jaer drew^e hundert jaer dar nach in dem vier und sibiczistem jar an sand Johans tag zw^e den sunibenten.

Source Fulltext: OÖUB 8 (Wien 1883) S. 705f., Nr. 695