ICH Ann von Grueb hern Symonns witib des Fenken seligs und ich Agnes sein tachter wier verjehen, umb den hof gelegen dacz Streblicz in sand Vallteins pfarr da Chunrat auffsiczt, der jerleich dient syben schilling pfening an sand Jo^ergen tag und ain pfunt pfening an unsrer vrown tag zu der dienst zeit der unser vreys ledigs aygen ist und unser gechaufftz guet, daz wier den selben hof mit allen den rechten und nu^eczen so darzue geho^ert von allter wie so daz genant ist haben gegeben zu dem gotshaus ze Garsten den erbern geistlichen convent pru^eedern daselbs, und haben daz getan durich Got und durich des egenanten unsers lieben wierts und vater hern Symons des Fenkken dem Got genad sel und durich unsrer und aller gelaubigen sel hail willen, also er daz selber hat geschafft mit seinem geschefftprief an seinen lezsten zeiten daz man sein selgeret mern schu^ell und an seinem jartag ain mess singen von gotsleichnam und ain selmess und darzu^e zwo mess sprechen, und schol der guzster jerleich an seinem jartag zwelif cherczen darzue leihen und pei der par aufstekchen, und darumb schol im gevallen besunder der guzstrey ze fu^eedrung von dem obgenanten gelt drey schilling pfening. dis (sic) pfening schu^ellen den conventpruedern gemain daselbes ze pezzerung irr pfru^eent beleiben. Daru^eber zu ainem urchu^end der worhait geben wier ich obgenanteu Ann und ich egenante Agnes ier tochter den prief besta^ett mit des erbern ritter hern Michels des U^etendorffer anhangunden insigel, dem der vorgenant unser lieber wiert und vater her Symon der Fenkk seliger alz sein geschefft hat mit seinem geschefftprief hincz seinen trewn an seinem ende empfolhen. Des sind zeug durich unsrer vleizzigen gepet in an schaden di erbern unser freunt Lorencz der Plesser Goetfrid der Sinczenperger und Perchtolt an dem Aygen mit iren anhangunden insigeln. Der prief ist geben nach Christes gepu^erd u^eber drewczehenhundert jar darnach in dem vier und sybenezkisten jar an sand Veyts tag.

Source Fulltext: OÖUB 8 (Wien 1883) S. 702f., Nr. 692