Jch ffridreich Hofer vergich für mich vnd auch für all mein erben offenleich mit dem brief vnd tun kund allen den die jn sehent hörent oder lesent, daz ich mit wolbedachtem muet vnd mit gutleichem willen vnd nach meiner frewnt Rat meiner Hawsfrawn Margreten fünfczig pfunt wienner pfenning gemacht han auf meinem erb dacz der Sulcz vnd auch auf aller meiner hab, di ich ir doch emalen gemorgengabt han ze offner Hochczeit, da auch erber lawt pey sind gewesen vnd nu ze einer pezzern sicherhait, ob got vber mich gepüt, daz sy mich vberleben sollt, mach ich irs anderstund vnd verbrif irs mit all der stät, der sy dar zw wedarf vnd auch dar zw geho^ert wesunderleich mit meins genädigen Herren Abbt Ludweigs Hant ze Männsee, der ir di vorgenanten fünfczig pfunt auf der vorgenanten Hab verlihen hat, vnd westatt also daz ir fürbaz ewichleich nyemant chain chrieg noch chain engung dar jnn getün müg weder mit recht noch an recht, ez wär dann allz vil ob iemat nach meinem tod her fu^er cha^em vnd wolt erb dar zw^e sein ob der meiner vorgenanten Hawsfrawn margreten di vorgenanten fünfczig pfunt ga^eb vnd wolt sey da von vertigen dem mag si wol ze losen geben vnd süst nicht vnd ist ze merchen, ob mein vorgenant Hawsfraw verschied an erben, daz wir nicht erben mit einander gewunnen, daz got nicht geb, so sol di vorgenant hab her wider an mich vnd an mein erben erben . di handlung vnd daz geschäft hat sich offenleich vergangen datz sand Wolfgang da erber vnd pider lawt pey sind gewesen di auch der sach zewgen sind, wesunderleich Pauls Daniel ze den zeiten richter ze Wildenekk, Ott chelner ze Männsee, Hanns Tusslinger, Wolfhart pfnurr, Michel Wülfinger, Öttl von Jrning, Ch(arl) Amman dacz sand Wolfgang, Nycla Hagen, peter Schuster, Wolfel dacz den aw(er)n, Chunrad faschang, fridrich hafner, vnd ander erber Lawt genug, daz meiner oftgenanten Hawsfrawn Margreten daz allsampt also stat vnd vnuerchert weleib, gib ich ir den brief ze einer waren vrchund versigelten mit meins vorgenanten Herren Abbt Ludweigs ze Männsee Anhangenden Jnsigel daz er daran gehangen hat durch meiner vleizzigen pet willen Jm vnd seinem Gotshaus an schaden . daz ist geschehen do man zalt nach Christi gepurd drew zehen hundert Jar dar nach in dem Sechs vnd Sibenczkisten Jar an sand Elspeten tag.

Source Fulltext: OÖUB 9 (Wien 1906) S. 163-164