Cum sit opus necessarium atque pium innouari litteras super bonis, iuribus, libertatibus ac aliis utilitatibus ecclesiis datas, que propter earum uetustatem consumpte sunt et omnimodis uiluerunt, Nos Bertholdus dei gracia Babenbergensis episcopus tenore presentium litteras felicis recordacionis domini Tiemonis quondam episcopi Babenbergensis predecessoris nostri datas hospitali sancte Marie in pyrno monte decreuimus innouandas, quarum tenor talis est: In nomine sancte et indiuidue trinitatis Tiemo Babenbergensis episcopus omnibus christi fidelibus jmperpetuum. Statum ecclesiarum nostrarum pia sollicitudine considerantes ea, que ipsis conferuntur pro sui utilitate, memorie commendamus, ne propter prolixitatem temporum labilem recordacionem hominum hoc, quod uttiliter gestum est, consumat obliuio. Ad omnium itaque christi fidelium tam presentium quam futurorum noticiam peruenire cupimus, quod nos anno ordinacionis nostre tercio V. jdus januarij altare sancte marie in nouo hospitali cum cymiterio ipsius dedicauimus et omnia, que antecessor noster Otto secundus eidem hospitali deleganda deuouerat, nos pro gloria eternorum et remedio anime nostre ipsum altare cum eisdem redditibus dotauimus et perpetua donacione tradidimus, quod qualiter gestum sit, ut plene possint (?) agnosci, terminos et nomina singulorum locorum decreuimus inscribi: ab meridiana igitur parte a uertice montis pyrdonis ab ortu fluminis Tycha et ab occidente per alpes et rupes terminus est ad locum, ubi influuit riuulus Tivfenpach in Tycha, ubi tradidimus culta et inculta, tenditque idem terminus secundum descensum per medium medij collis usque ad terminos ville gerstensis. Hec omnia dux Styrie Otakarius in fevdo possidens predecessori nostro resignauit, cum quibus omne incultum nemus inter flumina pieznyk et Styer cum uno tantum culto manso, que simul in feodo tenuit, iam dicto hospitali perpetuo danda delegandaque resignauit, ab orientali vero parte ex ortu riuoli mozzyrniche secus decursum eius in Tampach Pertholdus consanguineus eius dux Meranie omnia nemora et rura pia promptaque uoluntate resignauit, ut sine contradictione predicto hospitali delegarentur. ab aquilonari vero parte in istorum reddituum medio unum tantum mansum pro domate iuxta flumen mu^elpach et nemus inter Erlpach et terminos ville preter culta prata, que tunc ad vsum ville pertinebant, memoratus antecessor noster ex persona propriaipsi hospitali deleganda contradidit. Hec autem cum inordinata et imperfecta usque ad nos transissent, in ipsa dedicationis die firma donacione super altare sancte Marie in eodem nouo hospitali potestatiua manu delegauimus. Preterea unus ex ministerialibus nostris nomine Otto de Grieven frater Rudegeri de Hage dei nutu conpunctus predium suum situm in loco, qui dicitur prv^enne, quod hereditarie possidebat, in ipsa die uoluntarie resignauit et sub manu nomineque nostro coram nobis super idem altare pro dote delegauit. post aliquantum vero tempus nos per ipsos montes iter agentes a fratribus ipsius domus honeste suscepti et humane sumus tractati magnisque precibus eorundem fratrum flagitati coram ministerialibus nostris Babenbergensibus uidelicet ac Hagensibus quoddam concambium cum eis cambiuimus duos mansus ex redditibus ecclesie nostre in loco, qui dicitur Langwat, ex culto et inculto usque ad incursum Erlpach in Tampach in altare sancte Marie uicissim concambiendo delegauimus, et e contra ex redditibus ipsius domus, quos in dicione sua tenebat, duos mansus, unum in der Steinwant, alterum in zew^eer ad usus ecclesie nostre in tantundem precij traiecimus. vt autem ista nostra actio et donacio firma sit et inconuulsa, hanc paginam fecimus conscribi et sigilli nostri impressione roborari. Item nos de speciali gracia innouamus et approbamus donaciones dicto hospitali per nostros predecessores felicis recordacionis Ekebertum et Heinricum nec non et omnes antecessores nostros et per nos specialiter factas easque ratas et gratas habentes ac ipsas auctoritate nostra tenore presencium confirmantes dictorum bonorum terminos, nomina pariter et loca propriis uocabulis duximus exprimenda. Bona sita inter fluuios Sepach et pieznyk. Item bona sita in Starlaz et Geswant. Item bona a monte Nynwitz iuxta eiusdem montis aque decursum usque in fluuium Mozzernyk et eiusdem fluuii descensum usque in fluuium Tampach. Item unum mansum in Lo^em et bona in winkl. Item buna inter fluuium Styer et montem. pyrdonem nobis et nostre ecclesie per mortem quondam Hertnidi de Orte uacantia, que dicte domui in remedium anime nostre tradidimus. Ceterum de licencia speciali concedimus dicto hospitali, quod bona, que procurator eiusdem hospitalis comparauerit a baronibus, ministerialibus, militibus uel ab alijs quibuscunque personis, siue ea bona, que iidem dicto hospitali testamentaliter delegauerint, que a nobis et a nostra ecclesia in feodo habuerint, liceat ex uendicione et donacione huiusmodi iure proprietario possidere. In horum omnium testimonium presentes literas dicte domui damus nostri sigilli robore communitas. Datum apud Aterse anno domini M. CC. L. VIIII. VIII. Kalendas nouembris, pontificatus nostri anno primo.

Source Fulltext: OÖUB 3 (Wien 1862) S. 263-265, Nr. 279