Wir Albrecht von Gocz genaden Herczog ze Osterreich ze Steyer ze Kernden vnd ze Krain Graf ze Tyrol zc. Embit vnserm getrewn Frikchen Purkchgrafen ze Klaws oder wer ye purkgraf da ist, Vnser genad vnd allz gůt. Wir haben des pharrer dacz dem Spital am Pi^eren brief vnd vrchund gesehen vnd gehort vber der selben seiner Kirchen lewt guter vnd Recht vnd haben dar an erfunden daz er auf der vorgenanten seiner chirchen Guter recht hat ze vischen vnd ze Jagen den dhlainen fuezz vnd aroch, den wandel von den seinen ze nemen vnd dar zü vmb alle sach di seinen ze pezzern, an alain swas an den tod get. Enphelhen wir dir ernstleich vnd wellen daz du in dar an vngeirret lazzest vnd dawider nicht beswarest vnd in vnd di sein pey denselben Rechten peleiben lazzest vnd da wider nicht beswarest, alz si die von alter gewonhait her pracht habent nach der vorgenant irer brief sag oder du tatest dar an wider vns, wann vnser lieber pruder Herczog Rudolf saliger sein brief awch dar umb gegeben hat. Geben ze Wien an sand Agnesen tag Anno domini Mo. CCCmo. LXXVIIJ^o.

Source Fulltext: OÖUB 9 (Wien 1906) S. 376-377