Ich Nikla der Schaffer purger zu sand Lienhart - vergich - vmb di vall deu ich vnd vier purgen veruallen waren meinem gnadigen Hern von Babenberg vnd auch seinem Haubtmann in Kernden vnd dar vmb wir gut brief geben heten, Nu hat mein obgenanter genadiger Her von Babenberg vnd auch sein Hauptman beschaiden vnd gnad an mir egenanten Niklan dem Schaffer getan vnd hat mich vnd mein purgen der selben vall aller gänczleich ledig vnd loz lazzen an alles geuar vnd dar vmb han ich mich ganczleich ergeben vnd verphlicht in meins obgenanten Hern gewalt vnd seins Houbtmans also beschaidenleich daz ich ir dienner sein sol vnd gehaissen pin in allen sachen zu wew man mich vordert oder waz man mir enphilicht oder enpholhen hat daz ich daz getrewleich vnd erberchleich handeln sol dy weil ich leb vnd auch von in vnd von dem goczhaus nicht ziehen sol weder haimleich noch offenleich an alain mit irem gutleichen willen vnd gunst, wär daz daz ich daz indert vberfur daz wissentlich war, so hat sich fürbaz mein leib vnd mein gut veruallen in ir genad, dar vber zu einem offen vrchund gib ich in den brief versigelt mit der erbern leut Hansen des pewerleins zu den zeiten purkchgraf ze Reichenuels vnd auch mit Vlreich des Richters daselben anhangunden insigel di si paide an den brief gehangen habent zu ainer gezeugnůzz der sach vnd auch durch meiner vleyzzig pet willen in vnd iren eriben an allen schaden dar vnder ich mich verpint mit meinen trewen allez daz stat ze haben daz an dem prief geschriben stet, wann ich nicht aigens insigels gehabt han, vnd ist daz geschehen vnd der brief geben am suntag vor sand Niklas tag nach christi gepurd vber dreuczehen Hundert iar dar nach in dem Acht vnd Sibenczigisten iare.

Source Fulltext: OÖUB 9 (Wien 1906) S. 540