Wir Albrecht von Gotes genaden herczog ze Österreich ze Steyr ze Kernden vnd ze Krain graue ze Tyrol etc. embieten vnserm getrewn dem lantrichter in dem Enstal vnd allen andern richtern, den diser brief geczaigt wirt, vnser gnad vnd alls gut. Wan wir durch fleizziger bete willen des erbern vnsers getrewn andechtigen Johansen Kessler pharrer ze Spital am Pyrn demselben Spital seine recht gnad vnd freyung, die es von alter herpracht hat, bestett vnd vernewet haben nach lautt des briefs, den daselbs Spital von vns darüber hat, da von gebieten wir ewch ernstleichen vnd wellen, daz ir dasselb Spital bey derselben gnad freyung vnd rechten beleiben lasset vnd da wider nicht komet in dhainen weg, also daz ir hincz des vorgenanten Spitals leuten nicht richtet noch mit in noch mit iren gütern, wie si genant sind si sein aygen oder höfe, ichts zu schaffen habt in dhainen weg, sunder habt ir zu desselben Spitals leuten ichts zu sprechen, darumb sullet ir ein recht nemen vor dem maister desselben Spitals oder von seinem anwalt, als die brief sagent, die dasselb Spital von vnsern voruordern vnd auch von vns darumb hat. Geben ze Steyr am Samstag vor vnser Frawntag, als si geboren ward, nach Kristes gepurd drewczehen hundert jar darnach in dem newnczigisten jare.

Source Fulltext: OÖUB 10 (Wien 1933) S. 640