Ich Wolfhart Ynprukkär phleger zu Steyr ich Hanns Chirchdorffer lantrichter ym Enstal vergehen, daz wir den erbern hern Hannsen den Chessler pharrer zu Spital an dem Pirn an aim tail vnd sein vrbarläwt an dem andern tail vnd haben auch gehört daz vrbar puch vnd erber läwt. Nach der chuntschaft haben wir gesprochen, daz die vrbarläwt iren dienst traid chäs phennig vnd swein geben vnd raichen schullen, als der bey fünf vnd zwainczig jaren herchomen ist. Sy sullen auch bey irn gütern beleiben, als daz von alter herchomen ist vnd daz gozhaws recht hat. Auch sol ez der Chessler gewöndleich wändel von yn nemen, damit sew vnuerdorben beleiben vnd sol sich auch mit vnbeschaidner red hinfür gen yn nyemer vergessen vnd sol sew auch vmb erbär sach in dhain swerew vnd vnerbern venkknuzz nicht legen. Auch sol er den schaffer vnd den amman abseczen. Bey dem obgeschribnen handel sind gewesen der erwirdig herr abbt Vlreich zu Glavnkch, Markchart der Tanpechk, Mainhart Pravnsperger, Jorg Rathayminger, Herman Mulrieder, Fridrich Pudminger, Atakcher der Paüssel, Peter richter zu Chirchdorff. Mit vrchund dez briefs versigelt mit vnser bayder des obgenanten Inprukker vnd Hansen dez Chirchdorffer aufgedrukchten insigeln, geben zu Spital an dem Piern am nachsten Phintztag nach sand Cholmanstag anno Domini etc. LXXXXM.

Source Fulltext: OÖUB 11 (Wien 1983) S. 207-208