Nos Otto Dei gratia Palatinus Comes Rheni, Dux Bavarie presentibus profitemur, quod, cum Ecclesie sancti Lamberti in Suben tam per nos quam per quondam charissimum Patrem nostrum dive recordationis,ac per alios fideles et successores nostros in Scherding, et maxime in obsidione castelli Neuburg esset multipliciter pregravata, sustinendo frequenter in suis bonis et hominibus graves iniurias atque dampna, nos in relevamen huiusmodi dampnorum ac etiam pressurarum ad perenne charissimi Patris nostri dive recordationis, charissime Matris mee Elizabeth et nihilominus pro nostra persona ac charissimorum fratrum nostrorum salutis augmento venerando Preposito eiusdem loci et successoribus suis quibuscumque indulsimus per favorem gratie specialis, quod unum talentum maioris ligaminis salis et quatuor minoris semel in anno possint ducere suis vecturis absque exactione telonii cuiuslibet sive Mutae. Et ipsi Prepositi, qui pro tempore fuerunt, cenam cum conventu suo in recompensam huiusmodi gratie sibi facte prescriptorum Progenitorum nostrorum etiam et charissimorum fratrum nostrorum anniversarium singulis annis semel ac solemniter celebrabunt. Ad quod prefatus venerandus Prepositus se simul cum suo Conventu pro se et successoribus suis nobis fide prestita obligavit. In cuius rei testimonium presens instrumentum eis dedimus Sigilli nostri robore communitum. Datum et actum in Scherding anno 1293 in die conversionis beati Pauli Apostoli.

Source Fulltext: OÖUB 4 (Wien 1867) S. 179-180, Nr. 196