Stephanus Dei gratia Comes Palatinus Rheni, Dux Bawarie Vicedominis, iudicibus, preconibus et aliis suis officialibus gratiam suam et omne bonum. Exposuerunt nobis venerabilis Prepositus et Conventus Ecclesie in Suben, quod Rustici et Coloni sui Monasterii eis super iure hereditario in iudiciis movere consuererint actiones ipsos per huiusmodi eorum impetitiones fatigando et gravando laboribus et expensis. Nos nolentes in hoc casu ipsorum fatigationem et iniurias sustinere hanc ad dilecti nobis Heinrici de Schaumberg eorum Advocati petitionem gratiam fecimus specialem, quod eorundem Colonorum et Rusticorum impetitiones et actiones, quas predicto Preposito sueque Ecclesie moverunt et movebunt super huiusmodi iure hereditario, eis in hac parte suffragari non debeant nec ipsi Preposito sueque Ecclesie preiudicium seu dispendium aliquod generari, nisi ipsi coloni et rustici prefatum Prepositum suumque Conventum testimonio instrumentorum ipsis per eundem Prepositum suamque Ecclesiam datorum seu fide dignis et idoneis testibus ac aliis claris, certis et probabilibus indiciis seu demonstracionibus de suo iure valeant edocere. Quare volumus et mandamus vobis omnibus et singulis firmiter et distincte, quatenus ipsis huiusmodi graciam per nos factam per modum superius expressum debeatis attendere inviolabiliter et servare. Datum apud Landau M.CCC.VI. feria quarta proxima post Dominicam Quasimodogeniti.

Source Fulltext: OÖUB 4 (Wien 1867) S. 504, Nr. 540