Wernhardus², Dei gratia ecclesie Pataviensis episcopus, universis Christi fidelibus tam presentibus quam futuris salutem in eo, qui est omnium vera salus. Licet favor religiosis quibuslibet debeatur, illos tamen precipui favoris prerogativa prosequendos credimus, qui in agro dominico tamquam cultores experti verbum Dei seminant ipsumque salutaris confessionis ac penitencie ymbribus irrigantes uberius faciunt germinare; per quos cum nostre sollicitudinis onera circa nostros subditos indefessis studiis supportentur, ipsos condigni favoris nostri benivolencia honorare tenemur. Cum igitur fratres heremitani ordinis sancti Augustini^a, qui propter^b sua preclara merita et evidentem utilitatem in ecclesia generali ex eorum ministerio provenientem sunt merito diligendi, aput novam ecclesiam in Paden, quam dominus Leutholdus strennuus miles dictus Chreuzpech de predecessorum nostrorum licencia et permissione³ construxit et eam cum area adiacente ipsis dedit, tradidit et donavit, se velint recipere et ibidem pro conventu fratrum construere mansionem, dummodo nostra accedat permissio et consensus, nos, qui dictos fratres favore complectimur^c speciali et divinum cultum, in quantum Deus nobis facultatem tribuit, cupimus ampliare, donationem tam ecclesie quam aree in Paden per dictum militem ipsis factam ratam habemus et gratam ipsamque auctoritate^d dyocesana rite et rationabiliter confirmamus, dantes eis licenciam liberam domum et mansionem pro conventu fratrum in nomine Domini construendi. In cuius rei testimonium et perpetuam firmitatem ipsis presentes damus litteras sigilli nostri munimine roboratas. Dat(um) Patau(ii) anno Domini M° CC° LXXX° quinto, iii. id. Augusti.

Source Fulltext: MAURER, Augustiner-Eremiten Baden (=FRA II/89, Wien 1998) S. 52-53.