Wir pruder Perchtolt ze den zeiten prior¹ und die samnunge gemaine sand Augusteins ordens des gotshauses Unser Vrowen da ze Paden veriehen und tun chunt allen den, die disen prief sehent, lesent oder hoerent lesen, die nu lebent und hernach chunftich sint, daz wir mit gutem willen und gunst unsers stifter und unsers phleger hern Liutoldes von Chrebespach und aller seiner erben verchauft haben ainen weingarten, der da haizzet daz Gereute, der da leit ze Gumpolzchirchen, den uns der vorgenant her Liutolt unser stifter geben hette zu dem gotshaus Unser Vrowen da ze Paden durch Got und durch seiner vodern sele und durch seiner sele willen. Den selben weingarten haben wir gegeben vor rechter ehafter not mit unsers perchmaisters hant Dietriches von Gumpolzchirhchen² umb sechs und vierzich phunt Wienner phenninge, der wir recht und redlichen gewert sein, dem erbaern manne pruder Hainriche von Gleina³, der ze den Zeiten lantcommenteur was, und der samnunge gemaine von dem Teuschen Hause ze Wienne, ledichlichen und vreilichen ze haben und allen irn frumen damit ze schaffen, verchaufen, versetzen und geben, swem sie wellen, an allen irresal. Und daruber durch pezzer sicherhait, so setzen wir uns, ich vorgenanter pruder Perchtolt ze den zeiten prior und die samnunge gemaine sand Augusteins ordens des gotshauses Unser Vrowen da ze Paden mit sampt unserm stifter hern Liutolde von Chrebespach, dem vorgenanten pruder Hainriche von Gleina und der samnunge gemaine von dem Teuschen Hause da ze Wienne uber den vorgesprochen weingarten ze rechtem scherme fur alle ansprache nach landes rechte und geben in daruber disen prief ze ainem sichtigen urchunde und ze ainem offen geziuge und ze ainer ewigen vestnunge diser sache versigilten, ich pruder Perchtolt ze den zeiten prior mit meinem insigil und wir die samnunge mit unserm insigil. Und sint auch des geziug unsers hauses prudere pruder Chunrat der supprior, pruder Johan, pruder Hertweig, her Chalhoch von Eberstorf ⁴ chamrer^a in Oesterreich, her Marchart von Mistelbach⁵, her Alber von Polnhaim, Dietrich unser perchmaister und ander bidirbe leute genuch. Diser prief ist geben ze Wienne an sand Mathias tage bei pruder Hainriches zeiten von Gleina, do von Christes geburt waren ergangen tausent zwai hundert iar, in dem neun und niunzigistem iare.

Source Fulltext: MAURER, Augustiner-Eremiten Baden (=FRA II/89, Wien 1998) S. 70-71.