Ich Fridreich von Veikesdorf¹ unt ich Tuet^a2 sin housfrowe, wir veriehen unt tůn chunt allen den, di disen brief sehent lesen oder horent lesen, di nu lebent unt her noch chunftikh sint, daz wir mit verdahten můt unt mit gůtlichen willen haben geben ze chouffen den bru^edern von Paden sant Augusteins o^erden ein wisen, di da leit ze Drumawe, ze rehtem půrkhreht umb einlef pfunt pfenning Wienner munz, also daz uns di brůder dienen sullen von der selben wisen alle iar vier pfenning an sant Jorgen takh. Unt ist di vorgenant wis unser lehen gewesen von unsern herren vom Ror, hern Wolfkern, hern Otten, hern Dietmarn³, mit der aller dreier gunst unt willen ist der chouf geshehen. Daz di rede stet si unt daz gelubde unzebrochen, daruber so geb wir den vorgenanten brůdern disen brief ze einer urchunde unt ze einem gezeukh unt ze einer festunge diser sache, versigelt mit unserm insigel unt mit hern Wolfkers insigel vom Ror unt mit hern Otten insigel des Tu^ersen von Rauhenekke⁴, di diser sache gezeukh sint. Unt sint ouch des gezeukh, di her noch geshriben stent: her Alber von Paden⁵, her Haidenrich der Tehenstainer⁶, her^b Hainreich von Paden⁷, her Alber der Stainer⁸, her Herman der Star⁹, her Otte der Paier von Paden¹⁰, her Hainrich der Paier von Leestorf¹¹ unt ander frům leute genůkh, den diseu sache wol chunt ist. Der brief ist geben datz Paden, do von Christes geburde warn ergangen dreutzehen hundert iar, dar noch in dem ahtaden iar, an Unser Frowen takh in der vasten.

Source Fulltext: MAURER, Augustiner-Eremiten Baden (=FRA II/89, Wien 1998) S. 80-82.