Wir Ortlieb der Gumprecht purgermaister, der rat und alle gemayn der purger ze Regenspurch veriehen offenbar an dem bri^ef und tůn chunt allen den, die in ansehent oder ho^erent lesen, daz uns die gaistleichen und erleichen herren .. der prior und der conventt sand Augustins ordens datz unsers herren chappeln in unserer stat mit sampt den chlo^estern des selben ordens ze Wienne, ze Padm und ze Marichekk und mit sampt andern i^ern chlo^estern der ain und zwaintzich hundert march lo^etiges silbers Wienner gewichtes, der si uns fu^er unser herren die edelen fu^ersten in Osterreich schuldich sint gewesen, bericht und gewert habent gar und gaentzleichen ze rechten zilen und vristen an allen unsern schaden. Und davon geloben wir in alle gemainchleichen, daz wir noch unser purger noch nieman anders von unsern wegen dhainerlay ansprach noch voderung hintz in noch hintz ir nachcho^emen umb daz vorgeschriben gelt noch von des selben geltes wegen nimmer mer haben noch gewinnen schulen noch mu^egen, wan si ir hantvestt, ir trewe und ir gehorsam dar umb gaentzleich von uns gelediget und gelo^est habent. Und dar uber ze einem urchu^ende und ze einer staetichait geben wir in disen bri^ef versigelten mit unserr stat gemayn insigel. Daz ist geschehen, da von Christes gepu^ertte waren dreutzehen hundert jar und in dem sechs und zwaintzigistem jar, an sand Georin tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 110.