Ich Elzbet, hern Diethers wittib von Himperch, dem got gnade, vergich und tun chunt allen den, die disen prief lesent oder horent lesen, die nu lebent und hernach chunftich sint, daz ich mit willen und gunst meins suns Albrechtes des Hager und ander meiner erben mit verdachtem mute zu der zeit, do ich iz wol getun mocht, lauterlich durch got und durch aller meiner vodern sel willen und auch durch meiner selber sel hail geben han den erbaern geistlichen leuten prüder Ulrichen zu den zeiten prior¹ und der samnung gemaine der prueder sand Augustins ordens datz Paden und irn nachchomen meins rechten chaufgutes einen weingarten, der da leit ze Phafsteten an dem Haychobel² und haizzet der Haidenreichstainer^a, da man alle iar von dient meinen herren den hertzogen in Osterreich vier emmer weins zu rechtem perchrechte und nicht mer und den ich vorgenant Elzbet wittib weis gechauft han nach meins ersten wiertes tode hern Chunrades des Hager, dem got gnade, umb mein recht ledich varunt guet. Den selben weingarten han ich vorgenant Elzbet geben den vorgesprochen prudern sand Augustins ordens datz Paden und irn nachchomen mit allem dem nutz und recht, als ich in in perchrechtes gewer her pracht han, so beschaidenlich, daz si und ir nachchomen mir und allen meinen vodern pei meinem lemtigen leibe und auch nach meinem tode ewichlich davon begen suln alles daz, daz ich mit in geschaft han. Und swelches iars si des nicht entuent, so sol ich oder mein erben uns denne des selben Weingarten mit ir guten willen underwinden und innehaben, so lange untz si oder ir nachchomen alles daz begent, daz ich han geschaffet. Und pin auch ich Elzbet und ich Albrecht der Hager ir sun unverschaidenlich des selben weingarten ir und ir nachchomen rechter gewer und scherm fur alle ansprach nach des landes recht ze Osterreich. Und daz daz selgeraet^b furbaz also staet und unverwandelt beleibe, darumb so haben wir in geben disen prief zu einem offen urchunde, versigilt mit unsern insigiln und mit meins pruder insigil hern Leutoldes von Wildekke, zu den zeiten forstmaister in Osterreich³, und mit hern Haidenreichs insigil von Taehenstain^c, die diser sach gezeug sint mit irn insigiln. Diser prief ist geben ze Wienne nach Christes geburt dreutzehenhundert iar, in dem ain und dreitzgisten iar, darnach an sand Peter und sand Pauls tage.

Source Fulltext: MAURER, Augustiner-Eremiten Baden (=FRA II/89, Wien 1998) S. 112-113.