In nomine Domini, amen. Otto, Dei gracia dux Austrie, Styrie et Carinthie etc. omnibus in perpetuum. Illustratur serenius principis condicio, dum presidendo terreno dominatui pietatis exercitio pro transitorio permansurum et pro terreno celicum lucrari studuerit incolatum. Hac etenim commutacione utique celebri et devota non solum mansione polorum siderea, imo perenni visione et glorificatione deifica perfruetur. Quocirca considerantes attencius nos posse potissimum pietatis exercitium in divini augmento ministerii et religiose vite propagacione perficere, nostre gracie oculos et favoris in viros religiosos fratres ordinis eremitarum s. Augustini de Paden, devotos nostros charissimos, quos eo ampliori graciarum prerogativa in Dei laudem confovere disposuimus, quo magis ipsos monastice ac celibis vite insigniis clarere cognoscimus, dignum duximus convertendos, ipsis numine S. Spiritus inflammati ad laudem sanctissimi corporis domini nostri lesu Christi atque gloriose genitricis sue nec non remedium omnium progenitorum nostrorum de consensu et voluntate bona illustrium Alberti fratris nostri filiorumque nostrorum Friderici et Leopoldi charissimorum conducum terrarum nostrarum et coheredum, habita super hoc apostolice sedis et diocesani nostri licencia, donantes et assignantes donacione irrevocabili inter vivos aream olim nostrorum Judeorum cum capella postmodum ibidem erecta infra muros in Neuburg civitate nostra ex altera parte Danubii cum quibusdam areis adiacentibus, ubi ad cultum divini ministerii augmentandum novum eisdem monasterium cum choro et ecclesia, domo et aliis officinis eis necessariis fundandum erigendum permisimus, per ipsos tenendum, inhabitandum et perpetuo possidendum. Volumus preterea authoritate nostre jurisdictionis nihilominus perenniter statuendo, ut idem novum monasterium una cum ...bus^a et personis prenotatis illud ad gloriam divini numinis inhabitantibus omnibus libertatibus et honoribus gaudeat et fruatur, quibus alia monasteria a nostris predecessoribus ac aliis principibus fundata perfrui dignoscuntur, quodque idem monasterium cum personis prenotatis sub nostra et predictorum principum Alberti fratris nostri dilectissimi ac filiorum omniumque successorum nostrorum protectione speciali permaneat, ne ullis adversitatibus, quibus divinum obsequium prepediri valeat, perturbetur. Nulli ergo hominum liceat hanc nostre donacionis et fundacionis paginam infringere vel ei ausu temerario contraire, sicut omnipotentis Dei gravem ulcionem et nostre prefatorumque conprincipum nostrorum ac successorum indignacionem inflexibilem voluerit vitare. In cuius rei testimonium et firmitatem perpetuam sigillum nostrum duximus presentibus apponendum. Datum Vienne anno Domini millesimo trecentesimo trigesimo octavo, decimo tercio kalendas Decembris.

Source Fulltext: MAURER, Augustiner-Eremiten Baden (=FRA II/89, Wien 1998) S. 134-136.