In dem namen unsers herren, amen. Wir Ott, von Gotes gnaden hertzog in Ostereich, ze Steyr und ze Chernden, tuen hie und offen ein ewigeu chuntschaft und ein gewizzen allen den, die nu lebent und hernach chunftich sind: hocheu fu^ersten wirdichait wirt den¹ du^erchscheiniges lobes werd vor Got und dem menschen, swenne si darnach stellet, wie ir irdischeu herschaft, von dem almechtigem Got fu^erlechent, in hymelischeu ere und alleu zergenchleicheu hab in immerwernden lon werde verwandelt, daz auch nicht paz chan geshehen denne mit solihen genaden werchen, da Gotes ere und der menschen haiel von gemeret wirt hie auf der erde und Gotes anpliche nach disem leben vrolichen beschauet. Und wan die vingerzaig und die guet des Heiligen Geistes uns ermanet hat und erwekhet, daz wir nach solichen wegen unsers hailes pilleich betrachten, als vil und wir můgen, so haben wir uns fu^ergenomen mit rechter andacht und gantzem ernst ze stifften ein chloster in eren des vronleichnames unsers herren Jesu Christi und seiner rainen mu^eter, unser vrowen, und dar zu hab wir sunderlich erchorn die erbern geistleichen leut sand Augustins aynsidel pru^eder von Paden, unser lieben und andachtig chapplan, die wir so vil mer bedenchen und ze Gotes lob seu und iren orden steuren haben gedaht von sundern gnaden, als vil wir si des mer wert und du^erftich wizzen. Und dar umb so geben wir in mit gunst und willen unsers lieben pruders hertzog Albrechtes² und unser sune Fridreiches³ und Leupoldes⁴, hertzogen der vorbenanten lande, und auch des stules von Rome und unsers lieben ochems pyscholf Albrechtes von Pazzawe⁵ Urlaube und gunst in unser stat ze Neunbu^erch enhalbe Tuenau marchthalben⁶ die hofstat, die weilein waz unser Juden, mit der chappellen, die dar nach darauf erhaben ist und gepawet, mit den hofsteten, die dapei ligent, als vil daz die vorgenanten sand Augustins pruder und ir orden daselbes chirichen und chor mit chreutzgange und allem dem pawe, des si zu einem chloster und allem irem gemache ewichleichen bedu^erffen, [.. .]^a also daz si daselbes wonen schullen und beleiben Got ze lob und uns ze haile und allen unsern vodern selen ze hilf und ze trost, und wellen au^ech furbaz, daz daz selbe chloster mit allen den, die Got und der egenant orden darinne besament, an leuten und an guet auzgenomen und vrey sein vor aller ansprach und welicherlay mu^e ader twanchsal, davon si Gotes dinest fu^erirret mochten werden. Darumb so nemen wir dieselben chlosterstat in unsern sherme und unsere egenanten lieben pruders und unser chinde und aller unser nachchomen und wellen, daz si alle die recht haben und vreysal und wierd, die andreu semlicheu chloster habent, die von unsern vodern ader ander fu^ersten gestift sint. Swer aver der wer, des wir doch nicht getrawen, der wider diseu^b andachtigeu, vreyeu und rechteu unser gab und stift ichtes tet an worten ader werchen und Gotes gericht daran nicht envaricht, der schol vervallen sein in unser und unsers egenanten^c pruders und aller unser erben ungnade leibes und gutes. Und daz die unser gab^d und unser Gotes ewigez opfer gantz und ewich sey und stet belibe^e an allen chranch, so geben wir disen prief mit unserm anhangundem insigel bestetiget^f, der ist gegeben ze Wienne, da von Christes gepu^ert waren ergangen dreyzehen hundert jar, dar nach in dem acht und dreizigistem jar an sa(nd Elspethen tag)^g.

Source Fulltext: MAURER, Augustiner-Eremiten Baden (=FRA II/89, Wien 1998) S. 132-134.