Ich Margret, hern Ulreichs witib des^a Fuchs, dem Got genad, und mein erben, wir vorgehen und tu^en chund allen den, die disen prief lesent oder horent lesen, die nu lewent oder hernoch chunftich sind, daz ich mit vordochtem mu^et und mit gutem willen zu der zeit, und ich iz wol getu^en macht, den erbern gestlichen luten den prudern sand Augustins orden zu Unser Vro^en ze Paden han zu ierm chlaster gegewen recht und redleich und ledichleich, lauterleich durch Got und meines vater sel hern Niclos des Preuzleins^b und miner mu^eter sel Diemuten siner hausvroen und mines wirtes sel hern Ulreichs des Fuchs ze trost, mines gu^etes ein wingarten, der haizet der Snephenstainer¹ und leit ze Paden an dem Griez², und stet daz drittail des selwen wingarten eim iuden um gelt also weshaidenleich, daz der selb iud noch niment ander chain ansprach hat auf di andern zwai tail. Und darum so gib ich in de selwen ledigen zwai tail des vorgenanten wingarten ledichen mit allen den rechten, sam ich seu gehawet han, mit^c auzgenammenr red und mit solcher weshaidenhait, daz si de vorgenanten zwai tail shuln nemmen vur dreizich phunt Wienner phenning und shuln vu^er zwainzich^d phunt uns ledich lazzen den wingarten, der do haizzet Shiltchnecht³ und ist i^er phant gewesen von meim vater vu^er zwai phunt gelt zu seinem gartag untz so lang, daz man in last mit zwainzich phunten, und vu^er de andern zehen phunt shuln se alle mantag, diweil und daz claster stet, ein sel messe sprechen auf sand Achacen alter in i^er chirchen den vor genanten seln und allen unsern vodern seln ze trost und shuln auch den selwen seln pegen einen gartag ewichleichen den^e nasten suntag var sand Katrein tag, des obendes mit vigilig und des margens mit der sel messe, als des ordens gewanhait ist, und shuln vi^er cherzen aufstechen und shullen in selwen ze alter tragen vier semeln und zwen emmer weins und ein hindertail eines rind. Wer zu der zeit i^er shaffer ist, der shol den pru^edern mit zwain ezzen daz mol pezzern. Ich lub in und auch mein erben, waz in an dem vor genantem wingarten dreizich phunt abget und auch ob si von chainerlai ansproch dehainn shaden nemmen, daz shuln se haben auf allen unserm erb, daz wi^er hawen in dem lande ze O^esterreich, und shuln auch sherm sein an dem weingart vu^er alle ansproch. Se shuln auch mi^er, wan man peget den gartag, gewen ein halbz phunt phenning, der ich sechzig sol opphern mit einander auf iern alter und de andern sechzig auch sol um tailn, daz man se ins oppher...^f. Und wan ich gestirbe, so sol man^g daz halb phunt gewen den erben, und wer iz nimpt, der shol iz mit einander opphern auf den alter. Ich wil auch daz, daz de vorgenanten pru^eder mi^er den wingarten herwider ze chauffen gewen um dreizich phunt und nicht tewer, ob ich in chauffen wil. Wil ich sein aver nicht chauffen, so shuln si iern vrum dormit shaffen ze setzen und vorchauffen, also weshaidenleich, daz si daz vor wenant gesheft mi^er oder meinen erwen vorshreiwen auf einem andern erb, daz guet genu^eg sei. Und welichs gares ditz gesheft versaumt wurd, so shuln de nasten erben sich zu dem erb ziechen, untz daz iz gepezzert werd. Daz die sache also stet und unzebrochen weleib, darumme so gib ich in vor genante Margret di^h Fuchsin disen prief zu einer offen werchund und westetigung diser sache, verinsigelt mit meines pru^eder insigel Niclos des Preuzels, der der sache gezeug ist mit seinem insigel, wan ich aigens insigels nicht enhab. Iz sind auch der selwen sache gezeugen mit iern insigeln die erbern leut Wulfinch der Sheuchenstainer, Ulreich der Span, Albrecht der Hutter⁴. Diser prief ist gegewen, do vonⁱ Christ gepurd ergangen warden dreutzehen hundert gar, danoch in dem zwai und vierczichstem gar, an sand Lucein tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 143-145.