Ich Marigret di Planchenstainerin, di hern Ulreichs des Fuchs witib ist gewesen, dem Got genad, und mein erben veriechen und tuen chunt alle den, di disen prief lesent oder horent lesen, die nu lebent oder hernach chunftig sint, daz ich mit verdachtem muet und mit gesampter hant aller meiner erben zu der zeit, do ich iz wol getuen macht, geben han meim sun bru^eder Nyclan dem Fuchs¹, der da ist in augustiner ordten zu Paden, meines rechten aigens guetes vier und vierzehen schilling phenning geltes Wienner munz, di man dient zwier in dem iar, zwen und siben schilling an sand Gorgen tag, di andern zwen und siben schilling an sand Michelz tag, und di selbe gult ist mich von meiner anen der Snephenstainerin anerstarben und leit an der Neustift auf vier gehausten holden. Di selben phenning gult und di gult schol ich in nutz und in gewer haben unverchumert untz an mein tot und schol ims alle iar raichen. Taet ich des nicht, so schol er sein von dem guet bechomen oder von ander meinen guet, daz ich han in dem lant ze Osterreich. Wer aver, daz Got uber mich geputt, so schol der vorgenant bru^eder Nyclas der Fuchs di selben gult in nutz und in gewer haben untz an sein tot. Ist aver, daz ich ym chauff umb zwaizicht phunt ein gult auf uberlent nach seiner vreunt rat und nach andrer pider leut rat, so schol mein gult ledicht sein mir und mein erben. Wer aver, daz in ehaft not dar zu^e trib, iz wer von siechtum oder von andern sachen, daz im sein not wer, daz er mit der worhait wol bewern mecht, so schol er iz verchauffen und versetzen, so er aller pest mog. Ist aver, daz er iz mag verziechen, so schol di selbe gult pei dem chloster ewichleich beleiben, ym und mir und alle meinen vodern zu einen ewigen gedaechtnuzze, und schol daz geschechen nach meiner besten vreunt rat, di dann lebent. Daz deu red stet und unzebrochen beleib, daruber so gib ich im disen prief zu einen offenn urchunde diser sache, versigelt mit meins wiertz insigel hern Weichartz^a des Planchenstainer und mit meins bru^eder insigel hern Nyclas des Preussen und mit meins vetern insigel hern Ulreichs des Spans von Gaden. Der prief ist geben, do von Christes gebu^erd ergangen waren dreutzenhundert iar, darnach in dem dreiuntvierzigisten iar, an Unser Vrown tag ze der liechtmisse.

Source Fulltext: MAURER, Augustiner-Eremiten Baden (=FRA II/89, Wien 1998) S. 146-147.