Ich Hainreich von Weydunngs Awe und ich Preyde^a sein hausfraw^e, wir veriehen und tun chu^ent allen den, die disen brief lesent oder hörent lesen, die nu lebent und her nach chu^enftich sint^b, daz wir mit unser erben gu^eten willen und gu^enst, mit gesampter hant, zu^e der zeit, do wir ez wol getu^en mochten, und mit Arnolts hant in dem Teuffen Graben, zu den zeiten weser der chappellen gu^et gelegen in der Pu^erg ze Wienne, lauterleichen du^erch got bestett und geben han denn erbern geistleichen herren dem convent gemayn in der Augenstiner chloster ze Paden dritthalb jeuchart akchers, gelegen an dem Wienner perg und stozzent an Hainreichs akcher des Schu^ebrer, da von man alle jar dint der chappeln in der Pu^erg ze Wienne vier pfennig an sand Michels tag ze pu^erchrecht und niht mer, so bescheidenleichen, daz meins pruder su^en bruder Pernger in dem selben chloster die vorgenanten dritthalb jeuchart akchers in nutz und in gewer inne haben sol ze pezzerung seiner pfru^ent und seins gewants untz an seinen tode, und nach seinem tode suln si ledichleich beleiben dem convent gemain in dem vorgenanten chloster ze Paden fu^erbas allen iren fru^emen domit ze schaffen, verchauffen, versetzzen und geben, swem seu wellen, an allen irrsal. Und sein auch wir der selben drithalb jeuchart akchers ir recht gewer und scherme fu^er alle ansprache, als purchrechts recht ist und des landes recht in Osterreich. Und des ze urchu^ende geben wir in disen bri^ef, versigelt mit unserm insigel und mit des e^egenanten amptmans insigel Arnolts in dem Teuffen Graben und mit unser zwaier sweger insigeln Jansen von Zwerndorf und Otten des Grafenwerder, die diser sache zeug sint mit iren insigeln, und ander erber lau^et genu^ech. Der brief ist geben ze Wienne nach Christes gepu^ertt dreutzehen hu^endert jar, darnach in dem sechs und viertzigistem jar, des eritages in der pfingstwochen.

Source Fulltext: MAURER, Augustiner-Eremiten Baden (=FRA II/89, Wien 1998) S. 157.