Ich Chraft, Meinharts pruder des Eysentzieher ze Wienne, dem got gnade, vergich und tun chunt allen den, die disen brief lesent oder horent lesen, die nu lebent und hernach chunftich sint, daz ich mit meiner erben gutem willen und gunst, nach meiner pesten frewnt rat, zu der zeit, do ich ez wol getun mocht, recht und redleichen verchaufft han die gueter, die hernach geschriben stent: Des ersten mit meins percherren hant deß erbern geistleichen herren pruder Chunrats, zu den zeiten prior ze Gemnikch², allen meinen tail an dem weingarten gelegen ze Perchtoltstorf an dem Viechportz ze nest Albers weingarten des Pymier, dovon man alle iar dient den herren von Gemnikch funftzehen phening ze perchrecht und nicht mer. Darnach mit meins gruntherren hant des erbern manns hern Jansen von Rappach^3a allen meinen tail an dem haus gelegen an der Langen Mawr ze Wienne ze nest der Lepherinne haus, dovon man alle iar dient hern Jansen von Rappach^b zway phunt Wienner phenning fur gruntrecht und fur purchrecht und den herren hintz dem Heyligen Chreutz ain phunt phening ze purchrecht und nicht mer. Und daran auch mich vorgenanten Chraften und mein swester Engeln, Hainreichs witiben des Harmarchter diener, dem got gnade, der vorgenant weingart und daz haus anerstorben sint von dem vorgenanten unserm pruder Meinharten dem Eysentzieher, und die auch wir, ich und die vorgenant mein swester Engel, untzt auf disen hewtigen tag ungetailt mit einander gehabt haben. Den vorgenanten meinen tail, baide an dem weingarten und an dem haus, han ich verchaufft und geben mit allem dem nutz und rechten, als ich in unversprochenleichen in perchrechts und in purchrechts gewer herpracht han, umb hundert guldein phening, der ich gar und gentzleichen verricht und gewert pin, dem erbern herren meinem pruder pruder Chunraten, zu den zeiten prior ze Paden sande Augenstins orden, furbaz ledichleichen und vreyleichen ze haben und allen seinen frumen domit ze schaffen, verchauffen, versetzen und geben swem er welle an allen irrsal. Ich pin auch unverschaidenleichen mit sampt meinen erben des vorgenanten meins tails an dem weingarten und an dem haus, als vorgeschriben stet, sein rechter gewer und scherm für alle ansprach, als perchrechts und purchrechts recht ist und des landes recht in Osterreich und der stat recht ze Wienne. Get im furbaz daran icht ab mit recht, daz schol er haben auf mir und auf allem dem gut, daz ich han in dem lande ze Osterreich, ich sey lembtig oder tode. Daz diser chauf furbaz also stet sey und untzebrochen beleib, und wande ich selber nicht aigens insigils enhan, daruber gib ich im disen brief ze einem offen urchunde, versigilt mit meins vorgenanten percherren und gruntherren insigiln, des erbern geistleichen herren pruder Chunrats, zu den zeiten prior ze Gemnikch, hern Jansen von Rappach und mit des erbern ritter insigil hern Weicharts bey den Minnern Prudem, zu den zeiten purgermaister ze Wienne, und mit der erbern lewt insigiln ze Wienne hern Chunrats des Schonnaicher^c, hern Ulreichs des Veunden^d, die alle diser sache gezewg sint mit im insigiln. Der brief ist geben ze Wienne nach Christs geburde dreutzehen hundert iar, dar nach in dem funfczigistem iar, an sande Phylipps und sande Jacobs tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 168-169.