Wir Albrecht^a2, von Gots gnaden hertzog ze Osterreich, ze Steyr und ze Kernden, tun chund offenlich mit disem brif umb den chrieg, den die erbern und geistlichen leut, der abt und der conuent vom Heiligen Chreuz an ain tail und die augustiner und die gemayn ze Padn an dem andern tail, mit einander gehabt habent von dez wazzers wegen, das auz dem gepirge da herauz für Paden rinnet³, daz wir nach irr bete ze baider seit darzu sanden unsern getrewn Wolfgangen von Winnden⁴ unnd Chunrad den Schönaicher^b, daz si von unsern wegen beschowten die gebresten, die si baidenthalbn yzund davon hieten oder der chunftichlich von demselben wazzer mocht werden. Die habent daz getan nach iren trewn und habent ouch von unnserm haizzen und geschefts wegen daruber gesprochen mit baider tail gunst und willen in der weis, als hernach geschriben stet: Daz die Heiligen Chreutzer slahen suln ein wasserstubn und die auzzern wür wazzerhalben von der mül⁵ herab, als verr ire gemarcht gen, untz neben dem zawn, der siu angehört. Und ein andrew würn suln si slahen von der wazzerstuben untz an den steg gen Unsern Frawn pad⁶ uber⁷, also daz der mulgraben hingee und hinrinn zwischen denselben zwain würen. Und suln si die selben zwo wür und die wazzerstuben pezzern, alz oft sein nott geschiecht, an der augustiner ze Paden und der gemayn daselbz schaden. So suln dann die augustiner und die gemayn ze Paden slahen die wür lantzhalben, als si angevangen ist und dahin erd nemen unnd tragen aus dem mulgraben, der ytzund new wirt, alzvil si derselben erd bedurffen. Wer aber, daz man die erd auz demselben mulgraben nicht gar mocht austragen zu derselben wür, daz daz wasser seinen ganch und fluz völlichlich gehaben möcht, so suln dann die Heiligenchreutzer zwen tail geben und die augustiner und die gemayn den dritten tail, daz man dieselben erd aus demselben mulgraben gar auztrag^c zu der wur, daz daz wasser seinen rechten und voligen ganch und fluz gehaben mug. Und suln diselben augustiner und die gemayn diselben wür lantzhalben pezzern, alz oft sein auch nott geschiecht, an der Heiligenchreutzer schaden. Ouch suln die Heiligenchreutzer den vorgenanten mulgraben furbaz ze allen zeiten rawmen, swenn sein nott ist, an der augustiner unnd der gemayn schaden. Davon gebieten wir den vorgenannten Heiligenchreutzern und den egenanten augustinern und der gemain ze Paden und wellen gar ernstlich bey unsern hulden, daz si die vorgeschriben stukche und artikel, alz si von wort ze wort da oben begriffen sind, stete haben und volfüren an Widerrede. Swer daz aber uberfur und dez nicht tet, den wolten wir darumb swerlich pezzern. Mit urchund ditz brifs, geben ze Wienn an phintztag vor Oculi in der vasten, nach Krists gepurd dreutzehen hundert jahr, darnach in dem siben und funftzigistem jar.

Source Fulltext: MAURER, Augustiner-Eremiten Baden (=FRA II/89, Wien 1998) S. 171-172.