Ich Johanns der Schuchler ^a1 unnd ich Margreth sein haußfraw, wir veriähen unnd thuen kundt allen den, die diesen brief lesen oder hören lesen, die nu leben unnd hernach künfftig sein, daß wir mit unnser erben guetem willen unnd gunst, mit vordachtem muth unnd mit gesambter hand, zu der zeit, do wir es wol gethuen mochten, verkhaufft haben unnsers rechten aigens ain halb pfundt unnd vier pfenning Wiener münz gellts grundtrechts gelegen zu Gunvarn^b2 an dem Gayn in der Sülz auf acht weingartthailen, das weiln ain weingart gewesen ist unnd die zu den Zeiten die leuth innehaben unnd die ehegenannten güllt davon dienen alle jahr an sanct Michaels tag, alls hernach an diesem brief geschriben stehet: Des ersten Rüger der Schauch zu Gunvarn von zwayen thailen, von ieglichem sechzehendhalben pfenning; Niclaß der Scherel von ainem thail sechzehendhalben pfenning; Michael der Taubshörl von ainem thail sechzehendhalben pfenning; Mert von Mitterndorff von ainem thail sechzehendhalben pfenning; Andre der Öltegel von ainem thail sechzehendhalben pfenning; Anndre der Reißner, des Herter sohn, von ainem thail sechzehendhalben pfenning; Örtel der Wagner von ainem thail sechzehendhalben pfenning. Das vorgenannt halb pfundt unnd die vier pfenning Wiener münz gellts grundtrechts haben wir recht unnd redlich verkaufft unnd geben mit all dem nutz unnd rechten, alls wir es in aigens gewehr herbracht haben, umb fünff pfundt Wiener pfenning, der wir gar unnd gänzlich gewehrt sein, dem erbaren manne Johannsen im Winckhel zu Paden³, der daßelb halb pfundt unnd die vier pfenning gellts gekhaufft hatt zu dem ewigen liecht für unnsers herrn Gotts leichnams altar in Sanct Stephans pfarrkirchen zu Paden⁴, bey dem selben ewigen liecht fürbaß ewiglich zu bleiben. Unnd sein auch wir, ich Johannes der Schuchler^c unnd ich Margreth sein haußfraw unnd unnser erben unverschaidenlich, des vorgenannten halben pfundts unnd der vier pfenning Wiener münz gellts des ehegenanten Johannsen im Winckhel unnd seiner erben oder wer des vorgenannten ewigen liechts verweser ist rechte gewehren unnd scherm für alle ansprach, alls aigens recht ist unnd des landes recht zu Österreich. Wär aber, daß sie mit recht an derselben güllt icht kriegs oder ansprach gewünnen, was sie des schaden nemmen, das sollen wir inen alles ausrichten unnd widerkheren ohne allen iren schaden, unnd sollen auch sie das haben auff unns und auf allem unnserm guet, das wir haben in dem landt zu Österreich, wir sein lebendig oder todt. Unnd daß dieser kauf fürbaß also stät unnd unzerbrochen bleibe, darüber so geben wir ihn diesen brief zue ainer urkhund und zue ainer ewigen festung dieser sachen, versieglten mit unnserm insigel unnd mit Matteß insiegel des Ploder^d, der dieser sachen gezeug ist mit seinem insigel. Der brief ist geben zu Wien nach Christus geburth dreyzehenhundert jahr, darnach in dem sieben unnd fünfzigsten jahr, an unnsers herrn Gottes leichnams abend.

Source Fulltext: MAURER, Augustiner-Eremiten Baden (=FRA II/89, Wien 1998) S. 173-175.