Ich pruder Niclas der Fuchs und lesmayster sand Augustins orden vergich und tů chunt allen den, di disen prief lesent oder ho^erent lesen, di nu lebent und hernach chu^eenftig sint^a, daz ich mit verdachtem můt und aygenem willen, zu den zeiten, da ichs wol getůn macht, und mit meyner na^egsten freunt rat und gu^etleichem willen, di ich zu den zeiten pei mier gehaben macht, meyncz rechten aygencz vierczechen schilling und vier phenning gu^eltez Wienner muncz, gelegen ze Paden an der Neustiff auf vier pehausten holden, verchauft und geben han dem chloster und dem convent ze Paden mit allen den rechten und nu^eczen, als ich de selben gult in gewer herpracht han, um den weingarten, der da haisset der Buriger² und leit an Padener Perg ze nagst dez weingartez, der do haisset der Pegstayn³, und um vier phunt phening Wienner mu^ens, der ich gancz und redleych verriecht pin. Is schol auch der vorgenant convent ze Paden di gult in gewer ewichleychen unverchumert haben. Gieng aver dem offt genantem chloster ze Paden an den e genanten vierczechen schilling und vier phening geltez mit recht icht ab^b, is wer von gesleychen rechten oder von weltleychen, dez pin ich, e genanter pruder Niclas der Fuchs, rechter scherm und gewer fu^er alle ansprach. Ich vergich auch mit urchu^end dicz prieff, daz mier der weingarten verchaufft und geben ist nur zu leibgedingen unverchumert, und swen daz ist, daz Got uber mich gepeut, so schol der e genant weingarten mit allen den nuczen und rechten, als man in den vint, ledichleychen seyn dez offt genanten chloster und conventz^c ze Paden an allen chrieg und ansprach. Und daz der chauff und deu wandlung also stet und unzeprochen peleyben, darum gib ich in disen prief zu eynem offen urchund, versigelt mit meynem insigel und mit der erberigen herren insigel hern Fridereychs von Chreuspach und mit hern Wernharcz insigel von Thechenstayn⁴, de ich dez gepeten hab, daz si diser sach und wandlung zeug wern mit iren anhangundem insigel. Der prief ist geben noch Christez gepu^erd dreuczechen hundert jar, darnach in dem siben und fu^enfczgisten jar, dez na^egsten mitichenz vor sand Simons tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 180-181.