Ich Hainreich der Osterhofer² von Phafsteten^a und ich Margret sein hausvrow, wir vergehen an disem prief und tun chunt allen den, die in ansehent oder hörnt lesen, daz wir mit wol verdachtem mu^et und mit willn und gunst aller unser erben, zu der zeit, do wir ez wol getuen mochten, verchauft haben drei schilling Wienner phenning geltes ubertzins auf unserm weingarten, der do haist der Wild, gelegen pei dem Spitz in der Aynod pei Phaffsteten³, umb acht phunt Wienner phenning, der wir gantz gewert sein, dem erbern mann dem jungen^b Gorgen⁴ ... ze Phaffsteten, dem Got genad^c, und Christein seiner hausvron und irn erben, also beschaidenleich, daz wir oder wer den weingarten nach uns inn hat jaerleich da von din schullen die vorgenanten drei schilling geltes an sand Merten^d tag den geistleichen pruedern den augustinern ze Paden zu Unserr Vrown paw⁵ daselb, darzu si den dinst verschaft und geben habent durch irr sel hail willen. Und wenn daz ist, daz wir den dinst nicht geben an dem tag, als vor verschriben ist, so habent si vollen gewalt, auf den vorgenanten weingarten ze chlagen in alle dem rechten, alls purchrecht recht hat in Osterreich, unvertzigen der geistleichen herren recht von Gemnich, den man iaerleich von dem selben weingarten dint zwaintzig Wi^enner phenning ze perchrecht. Si habent auch den weingarten ingenomen fuer ein ee unverchummerten weingarten. Wir mugen auch die selben drei schilling geltes abloesen mit alls guetem gelt, alls der ist, wenn wir wellen, an all irrung. Daz die red war sey und fürbas stet und unzebrochen beleib, daruber geben wir in disen prief zu eim urchunt der warhait, versigelten mit des rechten perchhern pruder Jansen^e, ze den zeiten prior ze Gemnich⁶, anhangunden insigel, den wir des gepeten haben, daz er diser sach getzeug ist mit seim insigel, seinem gotzhaus an schaden, wann wir selben nicht insigel haben. Der prief ist geben, do man zalt von Christi gepurd dreutzehen hundert iar, darnach in dem siben und fumftzigsten jar, an sand Lucas tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 177-178