Ich Chunrat der Hentlinger^a2 ze Paden und ich Margaret sein hausvrou und all unser erben, wi^er veriechen und tu^en chunt offenleich mit dem prief allen den, dye in sechent oder horent lesen, daz wi^er unverschaydenleich verchauft haben unserm rechten gruntherren pruder Thoman, dye czeit prior dez chlosters sand Augustins orden ze Paden, und dem convent daselbs sechs schilling geltz purchrechts auf unserm hof, ³ da wi^er selb dye czeit auf gessessen sein, zenachst Chunratz hof auf der Vreium⁴, und auf der weingartsetz, dye hinden an dem selben unserm hof leit, und auf allen den guetern, dew wi^er haben, und auf alle deu, und czu dem selben unserm hof gehort, es sey gestift oder ungestift, versu^echt oder unversu^echt, wye so daz genant ist, und da wi^er alleu iar von dyenen dem vorgenantem convent drey schilling Wyenner phennig geltz an sand Michels tag cze rechtem purchrecht und nicht mer. Dye egenanten sechs schilling gelts auf den obgenanten erben allen hab wi^er cze chauffen geben mit wolverdachtem mu^et und mit gesampter hant, nach unser nachsten und pesten vreunt gunst und rat, ze der czeit, do wi^er es mit recht wol getu^en mochten, dem obgenanten unserm gruntherren, dem prior und dem convent, als vorbenant ist, um sechs phunt phenning Wyenner muniz, der wi^er aller gancz und gar verricht und gewert sein, also beschaidenleich, da wi^er dem egenanten unserm^h gruntherren und dem convent alle iar davon dyenen schullen dye sechs schilling geltz allzeit ze czwain tagen in dem jar unverczogenleich, halb an sand Merten tag und halb an sand Jorigen tag darnach, und schullen in den dyenst dyenen mit allen den rechten, als man ander purchrecht di^enst dyent in dem land cze Osterreich. Wer aber, daz wi^er in den dyenst cze ye dem tag nicht dyenten, als vor geschriben ist, so schullen und mogen se wol auf den egenanten unsern hof und waz dartzu^e geho^ert und auf all unsre gu^eter, als vor benant ist, vragen um ieren versezzen dyenst czwispild all vierczechen tag, alz versezzens dyenst recht ist in dem land ze Osterreich, so lang uncz daz seu i^ers egenanten geltz und i^ers versezzen dyenst gancz und gar davon bechoment mit unserm gu^etleichem willen, und was in daran ab get, daz schullen sew dennoch haben auf uns und auf allen unsern erben unverschaydenleich und auf alle dem gu^et, daz wi^er haben in dem land cze Osterreich oder wo wi^er es haben, wier sein lebentig oder tod. Wi^er mogen und schuln auch dye egenanten sechs schilling gelts wol ablosen, welchs jars wi^er wellen und mogen, nuer an der egenanten dyenst tag aynem, ymer drey schilling gelts mit drin phunt pheningen und mit dem dyenst, der dye czeit czerecht davon gevellet, an all widerred. Und daz der chauf und dye wandlung furbas also stet und unczebrochen peleib, und wan ich egenanter Chunrat und ich Margaret seyn hausvrou und all unser erben nicht aygens insygel haben^c, daruber geb wi^er dem egenanten prior und dem convent den prief tzu eynem waren geczeug und czu eyner vesten stetigung der sach, versigelt mit dez erbern herren insygel heren Christans von Tehenstayn und mit des erbern mans insygel Haugeyns^d dez Goriczer^e, dew wi^er vleizzichleich darum gepeten haben, daz seu der sach czeugen sind mit ieren anhangunden insygeln, an yeren schaden. Der prief ist geben nach Christes gepu^erd dreuczehen hundert jar, darnach in dem sechs und achtzgistem iar, an sand Ru^eprechz tag dez erichtags in der dritten vastenwochen.

Source Fulltext: MAURER, Augustiner-Eremiten Baden (=FRA II/89, Wien 1998) S. 223-225.