Ich Ulreich der Rigelpechk und ich Elzbet sein hausvrow^e, wir vergehen fu^er u^ens und fu^er alle u^enser erben und tu^en chu^ent allen den, die disen bief lesent oder ho^erent lesen, die nu lebent und hernach chu^enftich sind, das wir mit aller u^enser erben gutem willn und gunst, mit wolbedachtem mu^et und mit gesampter hand und nach u^enser ne^asten und pesten vreunt rat, zu^e der zeit, do wir ez wol getu^en mochten, vercho^euft haben u^ensers rechten freyn aigens ain halbs phunt und fu^emffthalben phenning Wienner mu^enizz geltes, gelegen auf den hernach geschriben weingaerten: Der erst weingart haizzt die Mu^em¹ und leit ze Paden zenest Wilhalms weingarten von Pottenstain, do Seifrid der Drescher ze Paden alle iar von dient drithalben und fu^emffczig Wienner phenning ze rechtem gru^entdienst an sand Michels tag. Der ander weingart haizzt auch die Mu^em² und leit zenest des vorgenanten Seyfrids des Drescher weingarten, und do Georig der Mayler, des Hawgen aydem, von dient alle iar dreizzig Wienner phenning an sand Michels tag auch ze gru^entdienst; und auf zwain setzen, die ain haizzt die Smu^erkkin^a und die ander die Hauslodnin, davon die augustiner ze Paden alle iar dienent zwaintzig Wienner phenning, und auf einem weingarten gelegen an dem Flachenhard³, davon die bescho^ern U^ellin⁴ alle iar dient zweliff Wienner phenning, und auf einem weingarten gelegen ze Phafsteten an dem Stainveld, genant die Primissin⁵, do man von alle iar dient zehen Wienner phenning, wer zechmaister ist zder pharr^b ze Paden⁶, auch ze gru^entdienst, allz auf sand Michels tag. Das vorgeschriben halbs phunt und fu^emfthalben phenning Wienner mu^enizz gelts, gelegen auf den vorbenanten weingaerten, haben wir recht und redleichen verchaw^eft und geben mit allen den nutzen und rechten, alzz u^enser vordern und auch wir ez alles in aygens gewer herpracht haben, umb sechtzig und fu^emff phunt Wienner phenning, der wir gantz und gar gewert sein, dem erbern geistlichen hern pru^eder Lewppolten von Gu^emppoltzchirichen⁷, zu den zeiten subprior ze Paden, fu^erbas ledichleich und vreileich ze haben und allen seinen fru^emen damit ze schaffen, verchaw^effen, versetzen und geben, wem er wil, an allen chrieg, wie im das allerpest fu^egt oder wol gevellt, an allen irresal, also beschaidenleichen: Wer daz, das er ez fu^erbas verchaw^effen oder versetzen wolt, es wer von notdurfft oder von wellicherlay sache wegen daz wer, so sol ers des allerersten ambieten das convent des chlo^esters ze Paden; wellen und mu^egen sew es danne von im losen und chaw^effen, so sol er ins ze chaw^effen geben fu^er ander le^awt an geverde. Wer aber, daz si es nicht chaw^effen mo^echten oder wolten, so mag und sol er sein fru^emen damit schaffen an alle irrung, als vor an dem brief geschriben stet. Und durich pezzer sicherhait, so setzen wir u^ens, ich Ulreich der Rigelpechk und ich Elzbet sein hausvrow^e, und all u^enser erben unverschaidenleich u^eber das vorgeschriben halbs phunt und fu^emffthalben Wienner phenning geltes den egenanten geistlichem hern pru^eder Lewppolt von Gumppolteschirichen oder swem ers fu^erbas scha^efft, macht oder geit ze rechtem gewern und scherm fu^er alle ansprach, als aigens recht ist und des la^ennds recht ze O^esterreich. Wer aber das, daz in mit recht an dem vorgenanten gelt icht abgieng oder daz si mit recht icht chriegs oder ansprach daran gewunnen von swem das wer, was si des schaden nement, daz su^elln wir in alles ausrichten und widerchern an allen irn schaden und su^elln auch si das haben auf u^ens unverschaidenleich und auf allem u^enserm gu^et, das wir haben in dem la^ennd ze O^esterreich oder wo wir es haben, wie so das genant ist, wir sein lebentig oder to^ed Und das der chau^eff fu^erbas also stet und unczebrochen beleib, daru^eber so geben wir, ich obgenanter Ulreich der Rigelpechk und ich Elzbet sein hausvrow^e, fu^er u^ens und fu^er all u^enser erben dem egenanten geistleichem hern pru^eder Lewppolten von Gumpoltzchirichen oder wem ers fu^erbas scha^efft, macht oder geit, den brief zu^e einem waren urchunde und zu^e einer ewigen vestunge der sache, versigilten mit u^enserm insigil. Des chaw^effs und der sache sind auch getzewgen die erbern Fridreich der Chekk und Hawg der Goritzer mit irn anhangunden insigiln, wannd wir sew vleizzichleichen daru^emb gebeten haben, in baiden an schaden. Der brief ist geben nach Christi gepu^erd drewtzehenhundert iar, darnach in dem fu^emff und achtzkistem jar, des mittichens in quattembmern vor weichnachten.

Source Fulltext: MAURER, Augustiner-Eremiten Baden (=FRA II/89, Wien 1998) S. 219-222.