Ich Seydel der Scherer¹ und ich Elßbeth sein haußfraw, wir veriahen für unns unnd für all unnser erben unnd thuen kundt offentlich mit dem brief allen leuthen, gegenwertigen unnd künfftigen, daß wir mit wolbedachtem muth unnd mit veraintem rath zu den zeiten, da wir es wol mit recht gethuen mochten, recht unnd redlich haben unnsern weingarten, der do leit an dem Kaltenberg unnd haißet der Päß unnd ist vorders ain freyer weingarthen gewesen, den selben weingarthen haben wir gewidmet unnd geaignet zu dem pad unnd zu der weydt auf der wür bey Unnser Frawen Capellen² fürbaß ewiglich dabey zu bleiben, wan daßelbig badt unnd die vorgenannt weydt haben unns die geistlichen herrn, die augustiner zue Paden, verliehen unnd geben zu rechtem purckhrecht zu versezen unnd verkauffen, allso beschaidenlich, daß wir oder wer nach unns das vorgenannt bad unnd den weingarten inhatt, sollen alle Jahr jährlich dienen zu rechtem purckhrecht an Sanct Michaels tag zween unnd dreißig pfenning in das closter zue Baden unnd nicht mehr. Unnd darumb durch beßer Sicherheit, daß fürbaß das badt unnd die weidt dabey, da wir wollen ein hauß auf bawen³, dester baß gestifft unnd gebauet werde unnd daß auch dem closter der zinß fürbaß bleiblich sey, darumb haben wir den ehegenannten weingarthen darzue gewidmet unnd gemacht. Unnd daß die wandlung unnd das gemächt allso fürbaß statt unnd unzebrochen bleib, darumb geben wir dem vorgenanten closter zue Paden den brief zue ainer wahren urkhund versiegelt, Unnd wan wir, ich vorgenannter Seydel und mein haußfraw Elßbeth, nichts aigens insigels haben, darumb haben wir fleißiglich gebetten den erbaren herrn herrn Wilhalmen den Chreuspechen⁴, daß er der Sachen zeug ist mit seinem anhangenden insigel, ihm unnd seinen erben ohne schaden. Der brief ist geben nach Christus geburth dreyzehenhundert jahr unnd darnach in dem drey unnd neunzigsten jahr, an Sanct Jacobs tag des heiligen zwölffpotten.

Source Fulltext: MAURER, Augustiner-Eremiten Baden (=FRA II/89, Wien 1998) S. 231-233.