Wir Ferdinand, von Gottes genaden zu Hungern unnd Böhaimb könig, infant in Hispanien, erzherzog zue Österreich, herzog zu Burgund, zu Steyr, zu Khärnten unnd zu Crain etc., grave zu Tyrol etc., bekhennen, daß wir aus beweglichen ursachen die erbaren geistlichen, unsere lieben andechtigen N. prior unnd convent des heiligen sanct Augustinus orden in unnser statt Paden in unnserm erzherzogthumb Österreich unnder der Enns gegenwürtig unnd künfftig sambt iren leiben, leuten, holden unnd güetern, so sie iezo haben unnd künfftiglichs überkommen werden, in unnser sonder gnad, schuz unnd scherm aufgenommen unnd empfangen haben wissentlich in crafft diz briefs, also daß die gemellten prior unnd convent bemelltes gottshauß zu Baden nu hinfür mit sambt iren leiben, auch ihr unnd desselben ires gottshauß leuthen, hollden unnd güettern in unnserm schuz unnd schirm sein unnd sich auch aller unnd ieglicher gnad, rechten, freyhaiten, privilegien unnd gerechtigkheiten unnd gewohnhaiten, unnd sonderlich damit sy unnd ir^a gottshauß von weiland unnsern vorfordern, fursten von Österreich, löblich begabt unnd fürsehen unnd der von allter her in possess unnd gebrauch gewesen sein, inmassen wie annder dergleichen ordens personen, so in unnserm sonnderm schuz unnd schirm sein, haben, gebrauchen unnd geniessen sollen unnd mügen, von allermeniglich unverhindert. Unnd gebieten darauf allen unnd ieglichen unnsern fürsten, geistlichen unnd weltlichen, prälaten, graven, freyen herrn, rittern, knechten, hauptleuthen, landmarschalckhen, vizthumben, vogten, pflegern, verwesern, ambtleuthen, lanndtrichtern, burgermaistern, richtern, räthen, burgern unnd gemainden unnd sonst allen anndern unnsern underthonen unnd getrewen, in was würden, stats oder wesens die sein, unnd insonderheit den edlen, ersamen, gelerthen unnd unnsern lieben getrewen N. unnserm statthallter, regenten unnd räthen unnsers regiments der Niderösterreichischen lannden ernstlich mit diesem brieve unnd wollen, daß sie die obgenannten prior unnd convent augustiner ordens obgemelltes gottshauß unnd ire nachkommen, ordens leuth sambt Iren zugehörigen leuthen, holden unnd guetern, diesen unnsern schuz und scherm, auch gnaden, privilegien, allt herkommen, recht unnd gewohnheit, alls obstehet, gerüeblich gebrauchen und geniessen lassen unnd daran wider allt herkommen unnd guet gebreuch unbillicher weiß nicht dringen noch beschwehren noch das yemandts anndern zu thuen gestatten, sonnder dabey von unnsern wegen, wie sich gebüert, handthaben, schuzen und schirmen. Das mainen wir ernstlich. Mit urkundt diz briefs, besieglet mit unnserm anhangenden insiegl, der geben ist zu Wien am vier unnd zwainzigisten tag des monats Martii, anno Domini fünfzehenhundert unnd im acht unnd zwainzigisten, unnserer reich im anndern.

Source Fulltext: MAURER, Augustiner-Eremiten Baden (=FRA II/89, Wien 1998) S. 273-274.