Wir Ferdinand, von Gottes genaden Römischer könig, zue allen zeiten mehrer des reichs, in Germanien, zue Hungern unnd Böhaimb künig, infant in Hispanien, erzherzog zue Österreich, herzog zu Burgund, Steyr, Khärnten, Crain unnd Wirtenberg etc., grave zu Tyrol, etc., bekhennen, daß unns die erbarn, unnser lieb andechtig N. prior unnd convent sanct Augustins ordens zu Baden in unserm erzherzogthumb Öesterreich under der Ennß, diemütiglich zu erkennen geben haben, wie inen unnser schuz unnd schermbrief ‚ welchen wir inen allhie in unnser statt Wien den vier unnd zwainzigisten Martii vergangnen acht unnd zwainzigisten Jahrs genediglich gegeben, von den Türcken, alls sie iüngist unnser statt Wien belagert unnd Baden auch ausgebrennt unnd verwüst unnd sie denselben brief zu handen gebracht hetten, zerschnitten unnd vernicht were, unnd unns derhalb undertheniglich bitten lassen, damit wir inen denselben wider von newen zu fertigen unnd zu geben gnediglich geruheten. So wir dan bemelten vorigen schuz unnd schirmbrief bemellter massen zerschnitten unnd vernicht gesehen, auch unnser ordenliche fertigung erkhennt, haben wir solch ir zimlich bette genediglich angesehen unnd ihnen solchen brief genediglich wider verneut unnd von newen gegeben, unnd laut von wort zu wort also:||
(folgt der Text von Urk. 104). Vernewen unnd geben inen denselben von newen hiemit wissentlich unnd in crafft dits briefs, mainen unnd wollen, daß derselb in allen puncten, articlen unnd innhalltungen krefftig beleiben unnd seyn unnd sie sich der freyheiten unnd genaden darinn begriffen allermassen wie vor gebrauchen unnd geniessen sollen, von allermeniglich ungehindert. Das mainen wir ernstlich. Mit urkhundt dits briefs, besieglet mit unnserm küniglichen anhangenden insiegl, der geben ist in unnser statt Wien am ain unnd zwainzigisten tag des monats Julii, im fünfzehenhundert unnd drey unnd dreissigsten, unnserer reich des Römischen im dritten unnd der anndern im siebenden jahre.

Source Fulltext: MAURER, Augustiner-Eremiten Baden (=FRA II/89, Wien 1998) S. 275-276.