Röm(ischer) kün(iglicher) may(estä)t unsers allergnädigsten herrn löblich canzler unnd regenten. Wolgeborn, gestreng, hochgelerth, edl, vesst, gnedige herrn! Wasmaßen ewer gnaden nach absterben unnsers ordens prior zu Baden rathschlag unnd bevelch zu guter fursehung deßelben unnsers ordens clösterlein ausgehen laßen, haben ewer gnaden aus beyligender copey zu vernemen. Wiewol ich mich ewer gnaden bevelch zu gehorsamb, auch dem orden zu gutem unzt auf weiter beschaid selbst hinaus gen Baden verfüegt, solche würtschafft in die hand genommen, aber mir bißher durch herrn Gerweckhen Awer dasjenig inhallt ewer gnaden bevelch, was der inventari vermag, meinem begehren nach nicht völlig uberantworthet, sonder Awer noch zehen pfundt pfenning noch bey seinen handen hatt¹. So hatt mir auch gedachter Awer ime gelübd zu thuen zugesprochen, das mir ganz frembd zu hören gewesen, dieweil sich ewer gnaden rathschlag unnd bevelch dahin nit erstreckhen, des ich mich mit sonder beschwär gegen ihn verwider. Zum anndern hat^a gedachter Awer jüngst vergangen freytag außerhalb meines wißens ain vaß wein aufthuen unnd schenckhen, auch dem leuthgeben ime das gelt zu raichen bevelch geben, das mir aber beschwehrlich, sonder demnach dem leuthgeben aufgelegt, mir das gellt zu raichen. Gnedige herrn, dieweil sich dan Awer obbeschribener maßen mehr dan sich ewer gnaden bevelch erstreckht sich zu handlen understehet, daß mir oder ainem andern conventual allso neben ime zu handlen beschwehrlich, nachdem dan die handtlung so groß nit ist, derhalben langt an ewer gnaden mein gehorsamb anruefen unnd bitten, unns des Awers mit gnaden zu entladen unnd zu befehlen, mir die zehen lb. d. inhallt des inventarii, die ich zu notturfft anlegen will, zu erstellen. Nicht weniger will ich solch closterl unnd würthschafft unz auf ferrer verordnung versehen, damit derhalb kain nachthail erscheinen soll. Will mich also ewer gnaden befehlen, ewer gnaden undertheniger caplan, N. prior zu Wien. ||
||
Urschriftliche Erledigung 1537 August 7. ||
Die Regierung bewilligt das Gesuch. ||
||
Dem prior hirauf anzuzaigen unnd zu bevehlen, daß er sich des closters zu Baden unnd derselben haußwürthschafft unterwinde, durch sich selbst oder ainen anndern tauglichen brueder fleißig verrichte unnd gueter haußwürth sey, biß auf weitern beschaid. Unnd dieweil sich nunmaln dermaßen allerley widerwillen zwischen ime unnd dem Awer zugetragen, damit aber künfftigen irrungen fürkhommen unnd abgestellt, so will die regierung den Awer der sachen auf ihr beeder begehren bemüßigen, das ime durch ainen schriftlichen bevelch verkhündet werden soll unnd daneben auflegen, daß er dem prior die empfahene zehen pfundt pfenning, dergleichen das gellt, so er von dem ausgeschenckten wein eingenommen, ohn abgang unnd verzug zustelle unnd volgen laße. 7. Augusti A^o 37.

Source Fulltext: MAURER, Augustiner-Eremiten Baden (=FRA II/89, Wien 1998) S. 290-291.