Allerdurchleuchtigister, großmechtigister könig, allergnedigister herr und landtsfürst etc. Küniglicher mayestät schreiben hab ich in demütigister pflicht unnd gehorsamb vernommen, in welchem ewer mayestät schreiben ewer künigliche mayestät mir gebeut, auf ewer küniglicher mayestät schreiben unnd deren von Baden supplication mit dem fürderlichsten nnderricht zu thuen, daß ich hiemit willigist alls ewer küniglicher mayestät unwürdiger caplan unnd provincial augustiner ordens für mein person unverlengert thue. In ewer küniglichen mayestät schreiben findt ich, wie richter unnd rath der statt Baden unnser arm closterl daselbst zu Baden in ihr spital begehren mit anzaigung der armen leuth, so derselben enden umb iren gesund dahin kommen, auch etlich derselben enden haußseßig in armuth kommene underhalten sollten werden, daneben gegen ewer kuniglichen mayestät in irer supplication hören laßen, sie solchen gottsdienst unnd guet werckh an- unnd außrichten wollen. So tregt ungezweiffelt ewer künigliche mayestät guetes wißen, daß iezmal allenthalben der geistlichen personen mangl ist, auch die von Baden in iren allten, wolgestifften spital unnd beneficien nit priester noch fürsehung, wie sich gebürt, gethon; geschweigen, daß sie sich gegen ewer künigliche mayestät hören laßen mit den viel aufrichten, so von meinen alltvättern unnd vorfordern alls provincialn und brüedern aus andern nationen unnd landen ihre aigne patrimonia der enden gebracht, dieselben irer gueter haußwürthschafft nach angelegt, sich mitsambt dem allmusen unnd gar ainer klainen fundation mit menig der brüder weder iezt wol erhalten haben mögen. Dieweil aber durch mehre verwarlosung deren von Baden das closter verbrunnen unnd verdorben, haben ernente vatter unnd guete haußwürth solche closter wider von irem zugebrachten unnd gestifften guet widerumben erbauen‚ auch jüngst der abgestorben prior fast all sein substanz darauf gelegt unnd wider nach verwüstung, so der Türckh gethon, erbawen, welchem ewer künigliche mayestät ernenntes closter von kayser, königen unnd allen fürsten von Österreich gegeben privilegia anno 33 confirmiert unnd bestattet¹; derselben confirmation copi hiemit ewer küniglichen mayestät fürbring demütigist anstatt meiner obrigkheit, der gewallt ich nit hab, etwas von dem orden wegzugeben, bittend, ewer künigliche mayestät müge^a dieselbe jüngst gegeben confirmation gnedigist alls unnser gnedigister herr unnd landtsfürst handthaben unnd bleiben laßen, dan mir solches ewer künigliche mayestät ungefehr vor ainem jahr mit den worthen "Wir wöllen euch unnd ewern orden kein violenz beweisen", des ich mich dan ganzlich bey ewer küniglichen mayestät versehen, der hoffnung, der allmechtige Gott, der aus haiden Christen macht, werde sein schäfflein unnd kirchen nicht verwüsten noch undergehen laßen, sonder die ehr seines himlischen vatters in aufnemen erhallten. Thue mich hiemit ewer küniglichen mayestät underthenigister, demütigister caplan befehlen unnd^b umb ewer küniglichen mayestät, ewer küniglichen mayestät liebsten gemahl unnd erben, fürsten unnd fürstin von Österreich, mit des ganzen ordens andechtigem gebet umb derselben lang leben, sieg unnd wolfahrt unableßig zu bitten befleißen. Ewer küniglichen mayestät demütigister caplan, indignus provincialis ordinis s. Augustini, Petrus Stigler.

Source Fulltext: MAURER, Augustiner-Eremiten Baden (=FRA II/89, Wien 1998) S. 295-296.