Die Römisch khu. mt. etc. hat der von Paden supplicierung bedreffenndt das augustiner closster daselbst bey in, welhes durch jungst des priors ableibung mit khainer ordensperson besetzt ist, auf das innen ir mt. solh closster sambt desselben einkumben und nutzung aus den ursachen in derselben ierer supplicierung begriffen zu ainem spitall ze machen und zu verwenden genedigist vergunen wold, vernumen. Nun ist ir mt. gedachtn von Padn in bedacht irs erlittnen schadens als derselben gehorsamen unnderthannen mit gnaden in dem und annderm entgegen ze geen genaigt. Ir mt. will aber in solh ir begern ausserhalb des provincials desselben ordens vorwissen also von stundan ze willigen nit furgen, sonnder ir khu. mt. welle demselben provincial schreiben und in vermonen, solh closster in ainer bestimbten zeit mit ordenßleuttn der notturfft nah zu besetzen. Wo nun gedachter provincial dasselb closster nit ersetzen mag oder dasselbig in solcher zeit nit thuet, alsdan will sich ir mt. auf obestimbt ir unnderthenig bit ferrer genedigelich entschliessen. Des hat also ir mt. denen von Padn zu genedigem beschaidt antzaigen wellen.

Source Fulltext: MAURER, Augustiner-Eremiten Baden (=FRA II/89, Wien 1998) S. 294.