Hochwürdiger, gestreng, hochgelerth, edl, vesst unnd gebietende herrn! Euer gnaden ist ohn allen zweiffel wol wißend das fürbringen unnd anzaigen richters unnd raths der statt Baden unnsers closters halben augustiner ordens daselbst, darin sich richter unnd rath beschwehren zum ersten unnd fürtreffenlichen des abgangs der brüeder, dardurch der dienst Gottes abgieng unnd geschmälert wurd; gib ich darauff euer gnaden undertheniglich zu erkhennen, wie wol ain zaitlang nach abgang weiland brueder Ambrosii Stockher priors daselbsten abgang der brüder gespürt worden mag sein, des sich dan richter unnd rath der statt Baden beschwehren gegen euer gnaden² unnd unns befehlen, dasselbig unnser closter mit ordens personen zu versehen, deß wir unns dan auf das, alls viel menschlich unnd müglich gewesen, geflißen demselben nachzukhommen, unnd haben iez wesentlich unnd bleiblich dahin gestellt, damit der dienst Gottes des allmächtigen geaugmentiert unnd wol unterhalten wurd, drey brüeder unnsers ordens auszurichten den gestifften gottsdienst, unangesehen daß die reditus unnsers closters zu Baden nichts oder gar wenig gestifft worden unnd von der burgerschafft darzue der wenigiste thail kommen, sonder, alls meniglich wißend ist, ains thails durch guete würtschafft unnser brüeder, ains thails auch durch erbschafft unnd bettl erlangt unnd uberkhommen worden; daraus wir hoffen zu Gott unnd euer gnaden, euer gnaden werden unns bey dem laßen beruhen unnd bleiben. Daß aber richter unnd rath der statt Baden angezaigt, solche reditus unnsers gottshauß zu Baden zu wenden in ain guet werckh, nemblich zue underhalltung der armen leuth - haben sie zumal ain spital gnuegsamb reichlich mit geistlichen stifften oder beneficiis unnd auch anndern stifften gnuegsamb versehen³, daß sie, alls ich vermain, mit diesem unnserm erbetlten güetl ain spital auszurichten nicht von nöthen haben, von wellchem sie euer gnaden vielleicht nicht oder gar wenig angezaigt. Daß aber richter unnd rath der statt Baden sich beschwären gegen unns aines predigers halben - sein sie, alls meniglich wißend, in irer pfarr wol mit drey predigern versehen, die dan das wort Gottes zu verkhünden wol wißen. Wiewol sie auch daselbst in irer pfarr sollen hallten acht oder neun priester, so sie kaum drey haben, von dem ich dan geschweig. Haben auch vor etlichen kurzen jahren unns enzogen das gefallen allmusen in dem badt von den badtleuthen unnd in anndern iren nuz gewendet, welches jahrlichen auff 30 lb. d. oder mehrers geraicht hatt, mitt welcher wir derselbigen zeit ainen prediger des worth Gottes, wie auch mit weniger mühe, das unnser convent unnd brüder mögen underhallten^a.||
||
Urschriftliche Erledigung 1538 März 22.⁴: ||
Die regierung nimbt des provincial erbieten hirin angezogen an, mit bevelch, daß er demselben in bestimpter zeit nachkhomb, das closter mit brüdern versehe unnd deßelben güter unnd einkhommen dermaßen in ein ordnung bring, damit das closter wider in aufnembung gebracht unnd der gottsdienst, so viel nach gelegenheit müglich, gefürdert werde. 22. Martii A^o 38^b.

Source Fulltext: MAURER, Augustiner-Eremiten Baden (=FRA II/89, Wien 1998) S. 297-299.