Ferdinand, von Gottes genaden Römischer zu Hungern und Behaim etc khunig. Erber andachtiger, wir werden bericht, wie das augustinercloster zu Paden bey jetziges priors daselbst inhabung mit desselben einkhumen und zuegehorungen in grossen abfall und verderben khumen und gebracht werden solle. Dieweill dann die notturfft erfordert, des ain aigentlichs wissen zu emphachen und dw aber hievor daselbst zu Paden die pharr versehen¹ und derhalben gelegenhait und gestallt bemelts closters und desselben guetter wissen magst, emphelhen wir dir und wellen, das dw unnser regierung unserer Niderösterreichischen lande, waß dir umb bemelt closter wissenndt ist, nämblichen wievill conventprueder in demselben bleiblich sein, wie es mit der haußhaltung ain gestalt hab‚ ob die weingarten, ackher und grundt in zimblichen paw sein und ob in khuertz von solchem closter grundt khaufft oder leibgedingweyß verwenndt worden oder nicht, in schrifft furderlichen berichtest. Daran thuest dw unnser mainung. Geben in unser stat Wienn am sechzehenndten Decembris anno etc. im xliiii^ten, unnserer reiche des Römischen im vierzehenndten und der anndern im neunzehenndten.

Source Fulltext: MAURER, Augustiner-Eremiten Baden (=FRA II/89, Wien 1998) S. 324-325.