Romischer khunigelicher maiestat hochlöbliche stathalter, canntzler unnd regennten der Niderösterreichischen lannde, hochwierdiger, wolgeborn, gestrenng, hochgelert, edl, vesst, gnedig unnd gonnstig herr! Unns ist den zwelfften December ditz vier unnd viertzigisten jar von eur gnaden laut hiebeyligunder copi ain khunigelicher bevelich oder comission betreffenndt das augustinercloster zu Paden erkhundigung zuegestelt unnd uberanntwuert worden, den wier mit aller gehorsam emphanngen. Haben unns darauf samentlich inhalt eur gnaden bevelich eegemelts closters erkhundigt unnd mit allem vleiß in gegenwuert sein des prior gehanndlt und beschriben, des wier eur gnaden hiemit verschlosne zuestellen unnd uberanntwuertten. Darinnen werden eur gnaden grundt der warhait erinndert. Solliches haben wier zu gehorsam eur gnaden unanzaigt nit lassen wellen, der wier unns gehorsamblichen bevelchen thuen. Datum Paden den xVii December anno etc. im vierundviertzigisten, eur gnaden gehorsam Innocencius¹ pharrer zu Paden unnd Gerweckh Auer von Herrnkhirchen.

Source Fulltext: MAURER, Augustiner-Eremiten Baden (=FRA II/89, Wien 1998) S. 326.