Romischer khunigelicher maiestat hochlöblich stathalter, canntzler unnd regenntten der Niderösterreichischen lannde! Hochwierdiger! Wolgeborn, gestrenng, hochgelert, edl, vesst gnedig herrn! Mier ist verschinen tagen von e.g. hiebeyligunder khunigelicher bevelich betreffundt das augustiner closter zu Paden erkhundigung zuekhomen, den ich mit aller reverentz emphanngen. Gib darauf e.g., als vil ich etlich jar heer bey dem yetzigen prior seines inhabens der wiertschafft halben gesehen, disen nachvolgunden bericht, als nemblich. Wievil conventprueder im closter daselbst zu Paden bleiblich und zu erhalten sein, kann ich e.g. annders nit berichten oder anzaigen, dann, das etlich jar heer unnd sonnderlich bey dem yetzigen prior khain conventbrueder, der ain zeit lanng im closter bleiblich wer gewest, unnd wann ainer schon dahin khomen, ist er an zway, trew oder vier monnat alda beliben, darnach widerumben hinweckhzogen, wie dann yetzt nuer ain ungerischer conventbrueder, so von dem Turckhen vertriben und nichts teutsch khan, verschinen sumer in das closter daselbst vergebentlich khomen, der villeicht auch nit bleiblich. Was nachmallen die hauswiertschafft betrifft, als vil ich etlich jar heer bey disem prior gesehen, ist durchauß mit allen dingen schlecht und in allem verderben, dann so vil das weingartpaw und die weingartten betrifft, derer ortten ich die weingartten unnd ackher gesehen, sein etlich jar heer schlecht und poslich paut, zu zeitten ain weingartten ainmall und der merer thaill nuer zwier gehaut unnd etlich gar in ödung khomben, wie dann menigelich dises prior wiertschafft waiß und erkhent. Waß unnd wievil aber diser prior von dem closter grunndt verkhaufft oder leibgedingsweiß verwenndt, in dem khan ich e.g. khainen bericht thain, dann mier umb solliche verkhauffung nichts bewist. Demnah und auß oberzelten ursachen werden e.g. erinndert, wie und was gestalt offtbemelts priors hauswiertschafft gestaltsam ist, hab ich e.g. zu gehorsamen bericht der warhait nach unanzaigt nit lassen wollen, der ich mich e.g. gehorsamblich bevellhen thue. Datum Wienn den xviiii Decembris anno xliiii, e.g. Unnderthaniger caplan.

Source Fulltext: MAURER, Augustiner-Eremiten Baden (=FRA II/89, Wien 1998) S. 331.