Allerdurchleuchtigister, grossmächtigister khunig, unnser allergenedigister erbherr und lanndsfurst etc. Als eur khu. mt. etc. auf unnser sonnder diemuetigs anlangen und underthenigs bittn das augustinercloster hie zu Padn mit aller und yeder desselben ein- und zuegehörungen zu unnserm armben burgerspital aus angebornner parmbhertziger miltigkait volgen ze lassen gnedigelich verwilligt, des wir uns gegen eur khu mt. etc., unnserm allergenedigisten herrn, in aller unndertheniger geharsam mit hochstem muglichen vleiß bedangkhen, das eur khu. mt. etc. unnsers armben burgerspitals unvermugen zu voron zu der höchsten er, preiß und glori Gottes so väterlich zu hertzen gefiert und mit angerurter donacion gnedigelich begabt, daran eur khu. mt. den armben durfftigen khrangken auch die belonung an allen zweifl bei Got dem allmachtigen darumben emphahen werden. Wir wellen des auch umb eur khu. mt. und derselben khunigelichen khinder langkh leben, gluckhsellige regierung und wolfart gegen Got zu bittn, als die armben geharsamen unnderthonnen aus schuldiger phlicht nimermer vergessen. Weil aber, allergrosmächtigister khunig, in solchem eur khu. mt. etc. will- und gaabbrief unnder annderm ain artikl vermag, wo sy (sic!) uber khurtz oder lanng aus schikung des allmachtigen zuedrueg, das e. khu. mt. etc. oder der provincial das angetzaigt closter mit ordenspersonen wider ersetzen wolltn, alsdan sollen wir an widerredt schuldig sein, dasselbig closter sambt seinen zuegehorigen guetern und einkumen widerumben von unnserm spital abzudröttn, und sodan, allergenedigister khunig, diser zeit ye bei oberurtem closter weder pargelt, silbergeschmeidt, wein, traidt noch ichtes annderß verhannden, sonnder er prior ye lennger ye mer groß geldschulden macht, die anligunden grindt und gueter auf leibgeding hinlässt und verwenndt, also das ime nuer allain fur sich selbst zu unnderhalten, geschweigen die ödn weingartn und grindt zu pauen, nit muglich zu erschwingen, dan in etlich jarn khain genieß und nutz von denselbigen, biß die zu fruchtn gebracht werden, zu emphahen verhoffendlich, wie dan unser spitlmaister ime dem prior zu seiner täglichen underhallttung und des closters notturfft traidt und annders von dem spital treullichen mittailt. Derhalben will uns unnsers ainfaildigen erachtens und verstoens fur beschwärlich angesehen sein, das wir das berurt closter, wan dasselbig durch unns aus unnserm aigen seckhl unnd armbuet wider erhöbt, die ödn weingartn und annder grindt in esse gebracht, auch in dem closter etliche zimer und anndere notturfftige gebeug zuegericht wurden, also an ainige ergetzlichkait und widerlegung unnsers aigen darthuens wider absteen sollen. Und wo diser artikl in eur khu. mt. gaabbrief in seiner krafft an ainige gnedige ferrere miltterung beleiben solt, khan eur khu. mt. aus hohem khunigelichem verstandt, damit eur mt. etc. insonderhait von Got begabt, erwögen und abnemen, wie auch größlich zu vermuetten ist, das der herr provincial gemelts ordens, wan das closter alhie durch unns wider erhebt wurde, zustundt ain anndere closster stifft ee verlassen und das hieig mit denselben ordensleuttn besetzen, uns und das armb burgerspital an alle ainige ergötzlichkait davon entsetzen mochte, des unnserm armben burgerspitall zu mörgkhlichem abfall und verdorben, auch den durfftigen khrangken prechenhafftigen leuttn zu abbruch und schmöllerung irer täglichen narung und unnderhalt größlich gedeien wurde. Demnach aus diser obeingefurter ursach bitten wir eur khu. mt. etc. als sonndern liebhaber und stiffter der armbenspitäl in aller diemuetiger geharsam, eur khu. mt. wellen unnser oberzolt beschwärlich furbringen gnedigelich zu gemuet fiern und väterlich bedengkhen, des closter ein- und zuegehörunden gueter, ee und dieselbigen unnserm burgerspital eingantwort werden, treullichen zu esstimiern und zu betheurn gnedigelich bevelhen, auch ferrer gnedigelich verwilligen, das in e. khu. mt. consens und gaabbrief neben inseriert, eingeleibt und angehangen werde, damit wir eur khu. mt. noch dem provincial das berurt closter sambt desselben einkumben abzudrötten nit schuldig sein sollen‚ allain es seie dan zuvor uns und unnserm burgerspital dasihenige, so wir zu erhobung, erpauung und widerbringung des berurtn closters und derselben edn grindtn dareingelegt und was dasselbig umb so viel uber die einantworttung und esstimacion pösser gemacht, erstat und betzallt worden, dan wir unns ausser diser conticion nit wol in ain guete wirdtliche haußhabung aus obangetzaigter beisorg einrichten, auch dem spital und closter stifft nichts fruchtpers oder erhöblichs hanndln khundtn oder möchten. Doch wellen wir eur khu. mt. hierinnen durchauß [S. 339] khain ordnung setzn noch maßgeben haben, allain das eur khu. mt. des alles gnedigelich behertzigen und das armb spital väterlich bedengken wellen. Thuen unns hiemit eur khu. mt. unnserm allergenedigistem erbherrn und landsfursten in aller diemuetiger unndertheniger geharsam schutz und schermb bevelhen, eur khu. mt. underthenige und geharsame N. richter und rat der stat Padn.

Source Fulltext: MAURER, Augustiner-Eremiten Baden (=FRA II/89, Wien 1998) S. 338-340.