Ich Peter Purgear und ich Andre Purger gebrúder gesezzen ze Czwetl und ich Lienhart Heanikem von Lewbs¹ vergehen fúr uns und all uns erben und miterben und ich Niclas Cistlear und ich Hans Rodnear und ich Hans Dinstel, all drey von Lewbs, vergehen auch fur uns und all unser erben und tun chund offenleich mit dem brieff allen leawten lembtigen und chunftigen, daz wír trewleich bedacht und angesehen haben die unvernufftichait und das unnucz leben unsers liben freunts Niclass des Waidhouęr, Hanses Waidhouęr sęligen sun von Lewbs, und haben mit veraintem rat und mit wolbedachtem mút nach gunst und wissen frumer erberr leawt zu der czeit, do wir es mit recht wol getún machten, den obgenanten unsern freunt Niclasen Waidhouer in das spital ze Czwetl geben haben und seine gúter, die im worden sind von vater und von muter, die alle gelegen sind ze Lewbs: von erst aîn weingarten des drew vírtail sind gelegen an dem vodern Haslách ze nachst Andres Walthers weingarten, davon man iearleich dínt sibenthalben pfenning dem erbern herren hern Chunraden Chawrhaimer, dieczeit pfarrer ze Lewbs, und drey pfenning dem erbern mann Hansen Panczír, burger ze Lewbs, in des Winchlear purchrecht und funf pfenning den geistleichen herren von Engelczell² und drey pfenning den geistleichen herren von Alderspach³ hincz dem erbern mann Andre Hírssen, burger ze Obernlewbs⁴ und dieczeit der obgenanten geistleichen herren amptman, und ain halbs iewch weingarten gelegen in dem Heandlein zenachst Hansens Chern weíngarten, darin man im dient vier pfenning und vier pfenning dem erbern herren hern Lewpolten, dieczeit kapplan zu Sand Niclas⁵ ze Obernlewbs, und ain weingarten, des drew vírtail sind gelegen in der Newnpeunt zenachst des Ungelter weingarten von Weytra⁶, davon man dínt vierczehen pfenning dem egen(anten) Hansen Panczír auch in des Winchlear purchrecht iearleich als purchrechts recht ist, alles an Sand Michels tag, und nicht mer. Es was auch dieczeit das vorgenant des Winchlear purchrecht dem edeln herren hern Vlreichen von Dachsperg versaczt und het es auch saczgweis ynne. Die vorgenanten unsers freunts Niclass Waidhouer gúter mít allen eren, rechten und núczen, so sy in purchrechts gwer herchomen sind, hab wir geben und vermacht mit purchherren und amptleawt handen, gunst und willen zu dem vorgenanten spital ze Czwetl, also daz sew fúrbaz ewichleich sullen dabey beleiben, umb daz man dem egenanten unserm freunt Niclasen Waidhoueor sein notdurfft und genueg in dem obgenanten spital teagleich geben sol und ein besundre diern halten mit speys und mit lon, die sein mit dínsten pfleg sein lebtag. Wear aber, daz es dem obgenanten unserm freunt Niclasen Waidhouear also nicht widerfur und im mit speys oder mit aufwarttung verczogen wurd, das sol ein spitalmaister understen und wennden. Teat er des nicht, so suollen und múgen wir uns der vorgenanten gúter aller mit allen nuczen wol underwinden, wann wir wellen, uncz daz dem egenanten unserm freunt das widervar und gewendet werde, als oben geschriben stet. Wir sullen und wellen auch hincz des vorgenanten unsers freunts gutern, so sy oben benant sind, hinfúr vor und nach seinem tod chain ansprach, vodrung noch warttung nymmermer gehaben noch gewínnen mit recht noch an recht in dhainer weys, es wear dann, ob sew ein spitalmaister verchumern wolt, so múg wir wol dasselb understen, damit die obgenanten guter dem spital nicht enczogen werden; und daz die sache hinfúr also steat und unczebrochen beleib, so geben wír all vorgenant fúr uns und all unser erben und miterben dem egenanten spital den brieff zu einem waren urchund mit der vorgenanten purchherren und amptlewt anhangunden insigeln, die wir darumb vleizzleich gepeten haben, und zu einer pezzern sicherhait hab wir auch gepeten den erbern Pernharten von der Erloff, dieczeit richter ze Lewbs in dem Nidernaygen, daz er der sach czewg ist mit seinem anhangunden insigel, im an schaden, wann wir all díczeit aigen insigel nicht heten; wir verpinden uns auch under der obgenanten erberr leawt insigel mit unsern trewn an alles gevear, alles das steat und unczebrochen ze halten, das oben geschriben und benant ist, und wann ich vorgenanter Hans Chern auch diczeit aygen insigel nicht het, so hab ich sunderleich gepeten den erbern weisen Hansen den Leawtweîn, díczeit richter ze Obernlewbs, daz er der sach auch zewg ist mit seinem anhangunden insigel, im an schaden, darunder ich mich verpind, alles das steat ze haben, daz in dem brief geschriben ist, mit meinen trewn an guear, geben nach Kristes gepúrde do man zalt vierczehenhundert und in dem funften iare an dem heiligen pfingstabent.