Ich Wolffgang Chwérenbách diezeit phleger datcz Liechtenfels¹ und ich Wilbúrg des vorgenanten Wolffgang haúsfráw wir vorgehen und fúr all unnser eriben und tuen kúnt menikleichen mit dem prieff allen lewten, den er fúrkumpt, lesent oder horent lesen, daz wír mit wolbedachtem muett und gueten willen zw der zeit und wír daz rechtleichen haben wol getúen múgen, recht und reddleichen vórchawffet haben unnsern hóff, der da gelegen ist ze Czwetel an dem Néwnmárkcht pey dem Oberhóffer tór und zenachst der stát máwr mitsampt der wisen und páwngarten dopey gelegen, daz alles púrkchrecht ist und do man ierleichen von díennet in des durichleuchtigen hochgeborn fúrsten kunigkch Albrechts ze Unngern, herczóg ze Ostereich und marichkgraff ze Máricharn etc. ambpt datcz Czwetel únnserm genedigen herrn ain halbs phúnnt Wienner phenning der swárczen múnnzz zw Sand Iórgentag zw púrkchrecht und nicht mer. Den obenanten hoff, wisen, páwngarten dopey gelegen und allen andern íren zuegehorúngen haben wir ze cháwffen gegeben und ínn cháwffwéys ingeantbúrt den erbern weysen den púrgern gemainchleich dátcz Czwetel und allen íren nachkómen umb sechzigk phunt gueter Wienner pheninng der swartczen múnzz, der wir von in gantcz gewert und pezalet sein an schaden, und dorumb so sullen und múgen sew nún hinfir mit dem vorgenanten hoff mitsámbpt der wisen und páwngarten dopey gelegen und allen andern iren zuegehorungen wol iren frummen schaffen mit vorsetczen, vórkawffen, geben, schaffen und vormachen, wem sew wellent, und domit hánndeln und túen nach allen iren gevallen an únns und an aller unnser eriben und an menikleichs von unnsern wegen irrúng an widerredd und an alles widersprechen, als chawffs nach lades [!] recht ist in Ostereich. Gieng in aber in der zeit doran icht ab oder daz in chrieg oder ansprách doran aúfferstúnd, von wem daz wer, mit recht, daz geloben wír in alles aúzzerichten und richtig ze machen an allen iren schaden und m?, als dann schermbs púrkchrecht recht ist nach landes rechten inn Ostereich, und sullen sew daz haben und wekómen datcz unns und allen unnsern eriben und dorzue aúff aller unnser hab und guet, wo wir daz haben inner oder aúzser landes ungeverleichen, und ob hinfúr icht ander prieff herfúr kómen, es weren weychprieff, chawffbrieff, gemechtbrieff, sátczbrieff, geltbrieff oder wellicherlay brieff daz mochten sein oder gehaysen wéren, die uber den obenanten hóff, wisen und pawngarten sagten und lawteten, die sullen all wider den gegenbúrtigen cháwffbrieff kain chrafft nindert nicht enhalen und gántcz tod und vórnichtet sein, und des alles ze urkúnd und ewiger westetigunng geben wír inn den brieff wesigelten mit mein vorgenants Wolffgangs des Chwerenbachs aygen anhangemden ínsigel, und wann ich auch obenante Wilbúrg diezeit nicht insigel gehabpt hab, so hab ich mit sunderem vleizz gepeten den edelen Iorgein den Pranntner diezeit phleger datcz Rastenberigk², daz der sein insigel an den prieff gehangen hat im und seinen eriben an schaden, dorunder ich mich obenante Wilbúrg und fúr all mein erben vorpinden ungeverleichen, alles daz hinfúr gantcz war und stet ze haben, waz an dem brieff vorschriben ist. Des ist allso auch gezeug durich unnser vleizsigen gepet willen der edel Wolffgang der Gassner diezeit hauptman und richter datcz Czwetel mit seinem anhangunden insigel, im und seinen eriben an schaden. Der prieff ist geben nach Christi gepúrd virzehen hundert iár dornach in dem acht und dreyssisten iare des phintcztags in den ersten vir tagen in der vásten.