Ich Lienhard Harrocher, zu Eppenstain und zu Mansperg phleger, bechenn fúr mich und an stat Andres des Greyssenekker, weylant hern Hansn des Greyssenekker saligen gedechtnuss sún, des gerhab ich pin, und fúr alle des obgenanten Andre des Greyssenekker erben offennleich mit dem brieff allen lewten gegenwurtigen und kúnftign, das ich recht und redleichen und lautterleich durch gotz willen gewydent und gestifft hab in Sand Iohanns kirchen zu Zwetel auff dem perg ein ewigen iartag auff einen halben hoff, gelegen zu dem Moodrátz¹ ob Zwetel, der des obgenanten Andre des Greissenekker váterleich erib gewesen ist und ist freys aygen, davon man iárleich dínt zweliff schilling phening und nicht mér, und den yeczundt Peter Prewer innhat, zu hilff und zu trost des obgenanten hern Hannsn und seins vater und múter, dy da begraben sind, und all ir vórvodern und nachkómen und aller gelawbigen sel hayl willen, den der ersam her Niclas techannt und pharrer yaczundt und all sein nachkómen pharrer zu Zwetel all iar iárleich an abgankg pegen schullen in der obgenanten pharrkirchen dem vorgemelten hern Hannsen Greyssenekker, seinem vater und múter und allen iren vorvodern und nachkomen und allen gelawbigen seln zu hilff und zu trost, an dem achten tag nach unser lieben frawen tag zu der schiedung des abentz mit ainer ganczen gesungen vigilig, mit newn leczen und mit geláwtt aller glokken auff dem perg und in der stat, davor man dem mesnár geben schol zweliff phenig, und des morgens mit ainem selambt gesungen, darzu man einen yetleichen pharrer, der diezeit ist, ophern schol fleisch und brott fúr finnff schilling phening, es sey tewer oder wolfaill. Under dem egenanten selambt schullen auch gespróchen werden vier selmess von vier briestern, den ain ytleicher pharrer erberleich und mit gútem genúgen essen und trinkken ain máll und iren solt fursehen und aufrichten schol. Item man schol auch den zwain gesellen und dem schulmaister sechsunddreissig phening geben von der vigilig und desselben tags dem prediger vier phening, das er umb des vorgenanten hern Hannsen Greyssenekker, seins vater und múter und aller seiner vorvodern und nachkómen und aller gelawbigen sel gedachtnúss hab auff dem lector und besunder ewigleich albeg, so man umb ander gelaubig sel pitt und als ander gestiffter iartag gewonhait ist daselbs zu Zwetel, davon man den gesellen alle quotember geben schol vier phening und dem mesnár zwen trag phennig von fleisch und brott in dy kirchen und aus der kirchen in den pharrhoff. Wer aber, das der offtgenant her Niclas techannt und pharrer oder sein nachkómen pharrer den iartag nicht begiengen. als oben geschriben ist, so schol sich der ratt der stát zu Zwetel der obgenanten zweliff schilling geltz auff dem obgeschriben hoff an alles gaistleich und weltleich recht underwinden und alles das davon begen, das oben an dem brieff geschriben stet, und auch als lang innhaben. Untz das alles das erstatt wirt, das von dem benanten hern Niclasen oder sein nachkomen unpillichen versawmbt ist warden. Und des zu urkund und ewiger bestattung so gib ich obgenanter Lienhard Harrocher den offen briff besigelten mit mein selbs aygen anhanngenden insigel, und zu einer mererr gezewgnúss der sachen so hab ich auch an stat mein selbs und Andres des Greyssenekker, hern Hannsen des Greyssenekker saligen sún, fúr den ich mich wissentleich angenomen hab, mit vleiss gebeten dew edlen Andre Rambinnger, hawbman zu Friesach, und Hannsen von Chaúa, vietztúmb zu Friesach², das sew auch ir insigel zu sambt dem meinen an den brieff gehangen habent, dach in paiden und allen iren erben an schaden, darunder ich mich obgenanter Lienhard Harrocher verpinde fur mich selbs und den egenanten Andren Greyssenekker mit meinen trewen fur uns und all unser erben, alles das stát und war zuhalten, das oben in dem brieff geschriben stet. Geben nach Christi gepurd vierzehen hundert iar und darnach indem achtunddreissigsten iare an Sand Larenczen tag des heiligen martrer.