Wir der rat der purger dacz Zwetel und dew gmain vergehen mit urchunde des priefz, daz uns daz wolle chunt ist und mit uns geschehen und gewandelt ist, daz der erber priester her Hertweig, ze den zeiten pharrer ze Espestorf¹, durch hails willen seiner selle und ze trost allen sein vodern hat gestift ain ebigew mess hincz Zwetel und hat uns darzue gegeben auf guetem erbe auf achczich phunt Wyenner, daz gelegen ist auf gueten weingarten zwain und auf aim gueten hof ze Lewbs²; und ist uns auch daz selbe guet inngantbuert und aufgegeben ledichleich(en) und wier auch des gedacht haben, daz bier dez selben guetez welen mer machen, daz sein berde auf cwellf phunt phenning geltz, auf daz selbig gelt hab bier alle gedacht, daz bier dew selben mess gern wolten stiften mit dem gegenbuertigen schueler Iacobo, der dez vargnanten pharrer hern Hertbeigs von Espestorf seins rechten prueder sun ist, ob daz ist, daz in daz Got beschaffen hat, daz er czu aim priester buert, daz er dann dew selbigen mess volenden scholle und darzue gebidmet und bestetigt berden schol uncz an seinen toet. Der sach und der bandlung sey byer czewg mit uerchunde dez priefs, den wier im gegeben haben mit unser stat anhangunden insigel, da man czelt van Cristes gepuert dreuczehen hundert iar darnach in dem acht und vierczkisten iar dez phincztags var Sand Lucein tage.