Ich Barbara, Wolfganns des Mulbanger saligen tóchter, und Andres von Aw, dem got genad, witib, bekann offenlich mit dem brief, das ich von den erbern und weisen .. dem geswóren rat und der ganczen gemain der stat ze Zwetel mit wolbedachtem mút, gunst und willen, gruntherren hannden gekawfft hab ain haws, das zu irem spital dacz Zwetl gehórt und das gelegen ist daselbs in der stat an dem Newmarkt zenachst Niclas des Mágerleins und Iórgen des Pinter payder hewser, davon ich alle iar iárleichen dyenen schol sechczigk Wienner phennig an Sand Iorgen tag in das ampt daselbs zu rechtem purkchrecht und nicht mer umb ain summ gelts, der sy aller von mír gancz entricht und gewert sind zw rechten tégen in solher beschaidenhait und mit ausgenomen worten, das ich vorgenante Barbara Awerinn das obgenant haws mit aller seiner zwgehorung nú fúrbas schol und mag innhaben allain mein lebtég frey und ledig von stewr, wacht, zierkk und von aller anderer robott, das núczen und nyezzen mit aller der stat gerechtigkait und allen meinen frúmb darinn betrachten, so ich pesst mag und mír fuegsam und núczleich ist, an all ír und ménigkleichs irrúng und widerred. Ich schol und wil auch den obgeschriben dienst sechczigk phennig gelts iarleichen raichen und geben an Sand Iorgen tag, als oben begriffen ist, und wann es zu schulden kumpt, dacz ich obgenante Barbara dy Awerinn mit dem tod abgee und nicht mer pin, so ist dann das vorgenant haws mit seiner zugehorúng, wíe ich das stiftleich und pawleich hinder mein lass, in und írem spital oder desselbn spitals, wer die zeit verbeser ist, gancz wider ledig warden, und sullen und mugen sich dann des freileich ledigkleich wider underwinden an aller meiner erben und frewnt und mánigkleichs irrúng und widerred ungevárleich und mugen dann írs spitals frúmb und nucz auch damit betrachten als mit anderm gút, so zu dem vorbenanten spital gehóret. Sew sind auch der obgenant rat und dy gancz gemain mein recht gwern und scherm fúr all ansprach und zusprúch, die mír auf das ebenant haws kómen mit dem rechten, von wem das wer, wo mír des notdúrfft geschiecht, als soleichs kawfs und leibgedings scherms recht und lanndes in Osterreich recht ist, das gelobent si mír fúr sich und ír nachkomen mit iren trewn war und stét zw haben, als das ír brief, der ich von in darumb hab, innhaldt und ausweiset, also gelob ich auch fúr mích und mein eriben war und stét zu haben, was an dem brief geschriben ist, trewleich und ungeverleich. Des ze urchúnd und warhait gib ich vorgenante Barbara Awerin fúr mich und all mein erben den obgenanten .. dem rat und der ganczen gemain disen gegenbrief besigelten mit meinem aygen anhangunden insigel. Der sach ist geczewg durch meiner fleissigen gepet willen der edel Iórig Prymistorffer, gesessen ze Zwet(e)l, mit seinem anhangunden insigel, im und seinen erben an schaden. Der brief ist geben do man czalt von Krists gepúrd vierczehenhundert iar und darnach im vierczikgisten iar des móntags in der ersten vastwochen.