Angelus Penestrinus episcopus, Bartholomeus tituli sancti Clementis, Philippus tituli sanctorum Petri et Marcellini, Antonius tituli sancti Viti, Iohannes Baptista tituli sancte Balbine, presbiteri, Iohannes tituli sancti Angeli, diaconus, miseratione divina sacrosancte Romane ecclesie cardinales universis et singulis Christifidelibus presentes litteras inspecturis salutem in Domino sempiternam. Splendor paterne glorie, qui sua mundum inefabili [!] illuminat claritate, pia vota fidelium de ipsius clementissima maiestate sperantium tunc precipue benigno favore prosequitur, cum devota ipsorum humilitas sanctorum precibus et meritis adiuvatur. Cupientes igitur, ut capella sancti Martini sita in hospitali intra muros Zuvetel Patauiensis diocesis congruis frequentetur honoribus et in suis structuris et edificiis debite reparetur ac libris, calicibus, luminaribus et aliis ornamentis ecclesiasticis divino cultui necessariis augmentetur, conservetur et manuteneatur fidelesque ipsi eo libentius devotionis causa confluant ad eandem et ad reparationem, conservationem et manutentionem huiusmodi manus promptius porrigant adiutrices, quo ex hoc ibidem dono celestis gratie uberius conspexerint se refectos, de omnipotentis Dei misericordia et beatorum Petri et Pauli apostolorum eius auctoritate confisi omnibus et singulis Christifidelibus utriusque sexus vere penitentibus et confessis, qui dictam capellam in prefati sancti Martini, sancte Katherine virginis et martiris et sancti Floriani martiris ac sancte Barbare necnon eiusdem ecclesie dedicationis festivitatum diebus a primis vesperis usque ad secundas vesperas inclusive devote visitaverint annuatim et ad premissa manus, ut prefertur, porrexerint adiutrices, nos cardinales prefati et quilibet nostrum per se pro singulis festivitatum diebus huiusmodi, quibus id fecerint, centum dies de iniunctis eis penitentiis misericorditer in Domino relaxamus presentibus vero perpetuis futuris temporibus duraturis. In quorum omnium et singulorum fidem et testimonium pre[mi]ssorum ad humilem supplicationem di[lecti nobis] in Christo venerabilis viri domini Iohannis Reyss decani eiusdem loci presentes litteras fieri nostrorumque cardinalatuum sigillorum iussi[mus] et fecimus appensione commu[niri]. Datum Rome in domibus nostrarum solitarum residen(tiarum) sub anno a nativitate Domini millesimo quadringentesi[mo] septuagesimoquinto, die vero decimaseptima mensis Maii, pontificatus sanctissimi in Christo patris et domini nostri domini Sixti divina providentia p[ape] quarti anno quarto.

Source Fulltext: Transkription und Regest: Mag. Klaus Birngruber und Dr. Herwig Weigl