Wir richter und rat der stat zu Czwetl bechennen all aynhellikchleich var manikchleich mit dem offenn brief fuer uns und all unser eribm und nachkomen und tuonn kúnd allen léwtn, der er fuerchumbt, das wir recht und redleich wolbedéchtleich und mit verainttem rat, so wir des gebalt hetten und wol getayn mochten, hingebm, verchauft und chaufleich ze kauffen gebm habm in chraft des briefs den prukchstas, gelegen enhalb des Champs zu nachst Hannsen des Messrér haws und stost mit aynner séytten auf die lanndstras, die da get uber den Galigenperkch, davon man uns all iar iérleich dient zu purkchrecht ze hilf der prukchen in die stat zu Zwetl an Sand Iorigen tag vier phennig der swarczen Wienner múnse und nicht mer. Den obgenantn prukchstas habm wir kéwfleich zu chauffen gebm dem weschaidn mann Hannsen dem Messrer und Kathrein seyner hawsfrawn und iern bayden eribm umb ain sum gelcz, daran uns wol benueget hat und der wír gancz und gar an allen schadn zu rechter zeit von inn entricht und weczalt sein. Wir seczen in auch nu hinfúr den tag des obgenantn prukchstas in nucz und gwer, das er oder sein eribm nu hinfuer damit handln und tuenn schullen und múgen mit verkawffen, verseczen, schaffen, machen und gebm, wem sy wellen, oder in selber behalden nach aller ierr fuegsamkait, wie sew des verlúst und so in das am aller pesten fuegt, an unser und unser eribm, auch unser nachchomen und ménikchleichs von unsern wegen ierrung und hindernuss und an alles widersprechen ungeverleich, doch unvergriffenleich an unserm dinst und lehenschaft. Wír schullen in auch den obgenantn prukchstas schermen und freyn und mit dem rechtn verantwurten var aller redleicher ansprach, als offt in des nat und durft geschiecht, nach dem lanndes rechten in Osterreich, als dann solichs kawfs und purkchrechts und des lanndes in Osterreich recht und gewanhait ist, getrewleich und ungeverleich. Des zu urchund gebm wír inn des den wesigltn chawfbrief mit unserm chlainen anhangunden stat secret, der gebm ist nach Kristi gepuerd tausentvirhundert und in dem newn und vierczgisten iar am nachsten freytag nach Sand Lambrechtz tag des heiligen bischolfs und marttrer.