Ich Velreich und ich Chunrat, gepruder von Liecht(e)nekk¹, und all unser erben unverschaidenleich, wir vergechen und tuen chund allen lewten, gegenburtigen und chuftigen, dy den prief sechent oder horent lesen, daz wier mit guetem willen und mit wol wedachtem muet und nach rat unser aller frewnt und zu der zeit, do wir ez mit recht wol getuen mochten, recht und redleich verchauft haben unsers rechten aygens guets und gelts drew phunt drey schilling und fumfczechen phening wynner munizz, gelegen auf gehausten, gestiften guet und auf uberlend zu Lengenveld² in dem aygen und auzzen darum und auf den hernach geschriben guetern und zu den zeiten dy hernach genanten holden dient alle iar ierleich an sand michels tag von erst der mulner an der mul sechczig phening und zu weysat vier phening, der Trolaysch von aim ganczen lechen achczig phening und zu weysat zechen phening, peter chornreittrer von aim halben lechen zwen und fumfczig phening und zu weysat fumf phening, Vnger(e)l von aim virtail lechen sechczig phening, zu weysat fumf phening, Hans Muerr von ainr halben hofstat achthalben phening, Ulreich Schark(e)l von ainr hofstat sechczechen phening, zu weysat vier phening, Syman Scheller von aim lechen ein halbz phunt, zu weysat zechen phening, leydinger von ainr hofstat sechczig phening, zu weysat fumf phening, peter scheller von aim halben lechen ein halbz phunt phening, zu weysat fumf phening, Obrecht ym Lendlein von aim weingarten ym drozzer pach dritthalben phening, Goeschel von Streczing³ von aim acher an dem parcz vier phening und von aim acher an dem Eysenhutlein drey phening, Ulreich chefer von aim acher an sand mertenp(er)ig drey phening, Niclas zechlaes von aim acher an dem frawnp(er)ig ain phening, Geys(e)l Griklin von aim acher an dem Lewbser weg zwen phening, Katrey, dy Eberleins toechter, von aim halben weingarten an dem Choetmansp(er)ig ain phening, Hans Dret(e)l von aim weingarten an dem Chotmansp(er)ig zwen phening, Clement, des maurer sun, von aim weingarten ym drozzerpach dritthalben phening, Jacob Tum(m)er(e)l von aim weingarten am parcz sechs phening, Hens(e)l Lewb(e)l von aim acher an dem Lengenvelder parcz zwen phening, Hans Mader von aim^* acher an dem Lengenvelder parcz zwen phening, Hans Lauttner von aim weingarten in der Sawpewnt ain phening, Thaman pamawz(e)l von aim acher an dem parcz fumf phening, Cholman chunter von aim acher ym Chirichpuchel fumf phening, Stephan pinter von aim acher am parcz fumf phening, Hans Mulner von aim weingarten an dem Chotmansp(er)ig vier phening und von aim weingarten an dem fraunp[er]ig ain phening, dy prediger von Chrems⁴ von aim weingarten an dem parcz zechen phening, Hans velczhalms von aim weingarten am Pheffenp(er)ig sechs phening, Mert Hentler von ainr wisen dacz den Pawngert(e)n ain phening, Katrey Lebin von aim halben weingarten an dem Choetmansp(er)ig ain phening, Hans Mueltrer von aim pawngarten auf dem perig newn phening, Jacob von Pernslag⁵ von aim weingartn zu Erlech⁶ vierczechen phening, Stephan posch von ainr secz an dem Lengenvelder parcz fumf phening und von aim acher pey Lewbmans secz vier phening, Stephan Stainhauf von aim acher an dem parcz vier phening, Hainreich Zehentner von aim weingarten an dem frawnp(er)ig vier phening, von aim acher an dem parcz zwen phening, Mert Chroesel von aim weingarten an dem parcz zwen phening, Hans, Merteins sun, von aim weingarten dacz Erlech sechs phening, Gilig, iuden richter, von aim acher an dem Lengenvelder parcz vier phening, Katrey wurczerin von aim weingarten inder Sawpewnt ain phening, Frid(e)l Huend(e)l von aim weingarten in der Sawpewnt ain phening, Ottel Roes in dem Guldein art von ainem art ain phening, Katrey Chraczerin von aim weingarten in der Sawpewnt ain phening, Lipp asenpawm von aim weingarten in der Sawpewnt ain phening, Hert(e)l velczchiricher von aim weingarten an Lengenvelder parcz sechs phening. Ann Plenchlin von aim weingarten an Lengenvelder parcz sybenthalben phening, Peter Tulsch von aim pawngarten in der Retschenaw sechczk phening, Andre, der Lebin aydem, von aim weingarten in der Sawpeunt zwen phening und allez, daz zuen den vorgenanten gult und guetern allen gehort, zu veld und zu dorf, ez sey gestift oder ungestift, versuecht oder unversuecht, wy so daz gnant ist. dy vorgenanten drew phunt drey schilling und fumfczechen phening aygens gelts hab wir auf den vorgenanten guetern und auf all ierr zugehorung, als vor genant ist, recht und redleich verchauft und hingeben mit allen den nuczen und rechten, als wir sew in aygens gwer her pracht haben und als sew mit alter her chomen sind, umb newn und achczig phunt phening und umb drey schilling phening Wyenner munizz, der wier gancz und gar gericht und gwert sein, dem erbern ganczen rat und der ganczen gmayn in der stat zu zwetel oder wem sew dew selben gult und aygnew gueter, dy sew umb ir ledigz varend guet gechauft habent, verbandelnt, verwechselnt, schaffent, machent oder gebent, furbaz ledichleich und freyleich zu haben und allen irn frummen damit zu schaffen, verseczen, verchauffen und geben, wem sew wellent, und allez daz damit tuen und wandeln, daz in aller pest fuegt und gevelt an allen chrieg und irsal; und durich pezzer sicherhait so secz wir uns wir obgenant prueder, ich Vlreich und ich Chuenrat, mit sampt unsern erben unverschaidenleich uber dy vorgenanten drew phunt drey schilling und fumfczechen phening aygens gelts zu rechtem gwer und scherm fuer all ansprach und zuespruch, als aygner gueter recht ist in dem lant zu Osterreich. wer aver daz, ob in icht chrieg oder zuspruech auferstunden, von wem daz wer, davon mit recht, waz sew des scheden nemen oder ob in dar an icht abgieng, den selben schaden schull wir in allen auzrichten und widerchern an all ier scheden und mue und schullen sew daz haben auf uns und auf unsern erben und auf aller unser hab, dy wier haben in dem lant zu osterreich oder wo wir icht haben, wir sein lemptig oder tad, und daz der chauf furbaz also stet und unczebrochen peleib, daruber geb wir obgenant prueder, ich Vlreich und ich Chuenrat von Liecht(e)nekk, fur uns und fur all unser erben in den prieff zun eynr warn urchund der sach, versigelten mit unser payder anhangunden insigel und mit unsers aydems hern Vlreichs von Winchel⁷ anhangunden insigel und mit unsers vetern hern Hainreichs von Liecht(e)nekk anhangunden insigel, der auch der sach zeug ist. der prief ist geben do man zalt von Christi gepurd drewczechen hundert iar darnach yn dem syben und newnczkisten iar an sand pertelmees tag des heyligen zwelifpot(e)n etc.