Ich Johanna, Chunrats witib von Liechtenekke¹, dem Got genad, vergich fur mich und fur all mein erben und tun chunt allen den, die den briefe lesend oder hórnt lesen, die nu lebend und hernach chunftig sind, das ich liepleich und frewntleich mich verebent und verrichtt hab mit den erbern weisen .. dem rat und den purgern gemaýnkleich der stat zu Zwetel umb alle die ansprach und vodrung, so ich hincz in hab gehabt von der zehen schilling und vier phennig Wienner munnzz geltes wegen, die freýes aigen sind, gelegen ze dem Tawreins² und ze dem Wilhalms³, die in der vorgenant Chunrat von Liechtenekke, weilnt mein wirt, ze kauffen hat geben nach írs chaufbriefs sag, den si von im darumb habent und die mein morgengab sind gewesen also, daz si mir fur all ansprach vodrung und alle meinew recht gegeben habent aýn gelt, dez si mich gancz und gar verrichtt und gewert habent und daran mich genuéget hat und wol genuéget an gevér, und darumb so hab ich mit guetem willen, mit wolbedachtem muet und nach meiner frewnd rat zu der zeit, do ich es wol getun mocht, mich der vorgenan(ten) zehen schilling und vier phennig geltes mit allen den nuczen und rechten, die darczu gehóret, verczigen und fúrczicht getan und verczeich mich der gancz und gar mit dem brief, das ich noch all mein erben noch ander ýemant von unsern wegen fúrbaz hincz der vorgenanten gúlt und irér zugehórung nymmermer chaýn ansprach noch vodrung haben noch gewýnnen sullen weder umb morgengab noch umb chayn ander sach an gever, sunder das der vorgenant rat und die purger gemainkleich der stat ze Zwetel und all ír erben und nachkomen sullen fúrbaz die egenan(ten) zehen schilling und vier phennig geltes mit allen den nuczen und rechten, die darczú gehórent, ledichleich und freýleich haben und allen írn frumen damit schaffen, verkauffen, verseczen und geben, wem si wellen an allen írrsal. Und das die berichtigung und sach fúrbaz also stét und unczebrochen beleib, daruber so gib ich in den brief fúr mich und fúr all mein erben zu einem warn urkund der sach, versigilten mit meinem anhangundem insigil und mit meins lieben aidems insigil hern Janen von Gewwpicz, den ich des vleizzichleich gepeten hab, daz er der sach geczeug ist mit seinem insigil angehangen. Der brief ist geben nach Kristi gepurt vierczehenhundert iar darnach in dem andern iar an Sand Peters tag, als er zu Rom auf den stuel geseczt warde.