Nos Gerdrudis dei gratia ducissa Austrie et Stirie vniuersis innotescere uolumus tam presentibus quam futuris presentem paginam inspecturis, quod, cum sciamus anime nostre salutis remedium comperari, quando eorum inopiam releuamus, qui ex institucione sanccita in omnipotentis dei seruiciis legittime militant et deuotant, abbati de Altenburch totique conuentui ibidem domus sancti Lamberti ad recompensanda dampna et dispendia multimoda, que dicta ecclesia a predilecto marito nostro pie memorie duce Hermanno multiformiter dinoscitur recepisse, ecclesiam in Rorenpach, contingentem nos iure patronatus, cum omnibus attinenciis eius contulimus perpetuo possidendam. Ut autem hec nostra concessio inconuulsa et omni permaneat euo rata, in euidens testimonium et cautelam presentem ei cedulam exhibemus cum appensione sigilli nostri, adhibitis ydoneis testibus, quorum nomina sunt hec: comes Chunradus de Wazzerburch, Heinricus pincerna de Habspach, Heinricus de Lichtenstein, Otto de Meissov, VIricus de Habspach, Wernhardus et Heinricus fratres Prvzelini, Vlricus camerarius de Hittendorf, Ortolfus de Schiltarn, Chunradus Lonholz, Ditherus de Himperch, milites; Otto plebanus de Medelich notarius noster, et alii quam plures. Acta sunt hec Winne, anno ab incarnacione domini M.CC.LI. proxima feria secunda post purificacionem sancte Marie.

Source Fulltext: BURGER, Urkunden Altenburg (=FRA II/21, 1865) S. 10