Nos Margareta dei gratia ducissa Austrie et Stirie ac marchionissa Morauie notum facimus vniuersis presentem paginam inspecturis, quod cum sciamus anime nostre salutis remedium comparari, quando eorum inopiam releuamus, qui ex institutione sanccita in omnipotentis dei seruiciis legitime militant et deuotant, abbati de Altenburch totique conuentui ibidem domus sancti Lamberti ecclesiam in Rorenbach, contingentem nos iure patronatus, cum omnibus attinentiis eius contulimus possidendam, ita tamen ut cuiuslibet ius sit saluum. Vt autem hec nostra concessio inconuulsa et omni permaneat euo rata, in euidens testimonium et cautelam presentem eis cedulam exhibemus, nostri sigilli munimine roboratam. Datum in Chrems anno domini millesimo ducentesimo quinquagesimo secundo, in die beati Clementis.

Source Fulltext: BURGER, Urkunden Altenburg (=FRA II/21, 1865) S. 11